Diasabra alrededor di 12:00 am a kibra un auto den cercania di Caya Ernesto Harms, antes Lagoenweg na Playa. Un persona, probablemente un adicto ambulante a kibra glas di un auto marca Honda modelo CRV color preto numera A-21714. E doño a parkeer su auto y bay den e club situa den cercania. Na momento cu el a yega su auto bek, el a haya e glas dilanti kibra y a realisa cu a bay cu su tas hunto cu tur su pertenencianan. Na mes momento, a tuma nota cu a kibra e glas chikito di un auto marca Hyundai modelo accent numera A-34978.
Polis a presenta na sitio pa tuma dato di e sucedido. A base di e informacion compila, e agentenan a realisa cu net prome cu nan a bay e asistencia, nan a haya un tas benta band’i caminda, den cercania di El Gaucho Restaurant, den Wilhelminastraat. E tas a resulta di ta esun di e doño di e Honda. E doño a keda masha contento despues di a pasa den un susto. El a gradici e polisnan pa ta atento riba caya. Mester remarca cu no ta prome biaha cu kiebro ta sosode den e area di Caya Ernesto Harms.
