Diasabra ultimo tabata dia cu Departamento di Asuntonan Social (DAS) ta paga bijstand pa luna di augustus. A informa cu e luganan di pago di tur luna a keda mescos. Pero parce cu un biaha mas varios cliente a yega pa cobra y haya nan cu sorpresa cu nan pago tabata blokia! Pakico nan no ta bini na remarca mas pa cobra, ningun hende por a bisa nan, sino mas bien un invitacion pa bolbe para den fila dialuna pa busca e motibo cu a para nan sosten financiero.
Esaki sigur a trece rabia y disgusto pa e situacion aki. Scol ta den habri y hopi mayor a conta riba e placa aki pa cumpra co’i scol pa nan yiunan. Hopi a hasta manda whatsapp pa Minister Glenbert Croes, pa puntra dicon a para nan bijstand, si e por tin di haber cu campaña a pasa y awo diripiente nan no ta bini na remarca pa cobra mas. Un cantidad a expresa na nos di ta sinti cu a uza nan den campaña y awo cu eleccion ta tra’i lomba, diripiente, sin avisa motibo adelanta, a laga nan bay para den solo pa despues bisa nan cu nan bijstand ta blokia.
No por sconde cu situacion economico di Aruba ta dificil. E tabata dificil caba prome cu pandemia, pero el a bira pio na momento cu pandemia a afecta nos pais. Hopi ta e ciudadanonan cu a perde trabou, a bay over na cobra bijstand. No ta un secreto cu e cobradonan di bijstand ta un peso pa gobierno, ya cu cada biaha di nobo e cantidad di clientenan cu ta cobra bijstand ta sigui crece.
Sinembargo, gobierno ta sigui priminti y ta duna mas ciudadano bijstand. Pero te con leu economia di Aruba por sigui carga e peso aki? Di unda lo sigui saca placa pa paga tur esunnan cu ta cobra bijstand? Hulanda ta manda placa tur luna pa paga FASE, pa banco di cuminda, subsidio di salario, tur esaki basa riba un acuerdo cu Aruba a cera cu Hulanda. Pero dado momento esaki tambe lo yega na su fin. Mester bin c’un solucion urgente pa problematica di bijstand aki, cu cada dia ta birando un monster cu gobierno mes lo no por controla mas.
Esunnan cu no a cobra por pasa dialuna na oficina di DAS na San Nicolas. Eynan ta unico caminda cu e clientenan lo por reclama y/o busca informacion e motibo pa cual nan bijstand ta blokia. E oficina di DAS na San Nicolas ta situa riba caminda principal, esta Bernhardstraat 75, na unda antes tabata Centro Medico San Nicolas.
