Solamente a pasa 15 dia despues di un denuncia haci door di famia Marcotulli, restauradornan di Casa Rosada, cu ta un monumento . Pues un structura protegi. Pero atrobe e adictonan ambulante, conoci bou pueblo como “choller”, a bolbe invadi e cas.
Fabio Marcotulli, na cuminsamento di aña a denuncia na prensa su caso debi na e constante problemanan causa door di e “chollernan” riba su propiedad. Delitonan cu parce no ta yega un fin, Marcotulli ta bisa.
Dia di e entrevista Marcotulli a comenta cu e y su famia a acudi na diferente autoridad en busca di siguridad pa su vivienda, el a denuncia e “choller”nan kendenan e tin identifica via di camara di siguridad, sinembargo autoridadnan ta “protege e chollernan” el a comenta e tempo ey. El a bisa di ta sinti un impotencia di no por haci algo contra e hendenan aki cu semper ta drenta su cas pa horta.
Awe Marcotulli y su famia un biaha mas, a busca ayudo di 24ora.com, segun el a bisa, pasobra niun hende ta scuch’e, ningun instancia ta pone atencion na su problema. E ta sigui ta victima di e adictonan ambulante cu ta horta den su propiedad, situa den Wilhelminastraat, un luga unda e “choller”nan parce a tuma control di e caya y ta haci loke cu nan kier. Parce cu nan ta intocabel ya cu un biaha mas nan a drenta e cas y a bay cu diferente material, a destrui algun cos y awo hasta ta tapa e camaranan pa no filma nan.
El a gradici polis di Santa Cruz cu a bin haci un inventario di loke e ladronnan aki a bay cu ne, y observa e zona unda e hendenan aki a pasa e anochi di e sucedido. “Lamentablemente nos a dicidi di saca tur nos mueblenan, lampi, mata, etc., tur cos den e cas pa evita cu nan ta drenta atrobe. Nan a haya nan mes ta tuma e decision aki pasobra ta mira cu cada bes e “choller”nan ta bira cada mas agresivo. “Nos ta preocupa pa nos siguridad. Despues di tur e denuncianan haci, e unico cos cu ta keda nos pa haci ta pa saca tur nos cosnan. Danki na 24ora pa yuda nos denuncia e robonan aki.”
