Servicio Secreto di Aruba awe a haya hermentnan nobo y moderno pa por funciona debidamente. Parlamento a trata awe modernisacion di e ley di servicio secreto, cu a conta cu apoyo di tur e fraccionnan den Parlamento.
E reunion publico no a dura mucho largo mirando cu tabata trata di un tema masha importante pa pais Aruba den cual tur e partidonan por a haya nan mes.
Servicio Secreto tin hopi autoridad pa haci investigacion pa garantisa siguridad nacional. Pero tambe ta importante, parlamentario Robert Candelaria di fraccion di AVP a bisa, cu ora e servicio ta haci su trabou, e cuadro legal mester cana cu tempo mescos cu a modernisa ley di polis. No solamente mester e autoridadnan di awendia, pero ta regla tambe e mecanismo di control di loke e departamento of no por haci.
E modernisacion ta duna e servicio e hermentnan cu e tin mester pa traha y duna garantia na comunidad cu tin un control di con nan ta uza nan autoridad ta keda den e cuadro legal.
E ley ta tecnico, pero tabata necesario e cambionan mirando cu criminalnan a bira moderno den forma cu ta comete nan delitonan. “Pa siguridad di Aruba por haci nan trabou y keda up to date cu tecnologia, mester haci cierto cambionan den ley,” Alan Howell di e fraccion di POR a bisa na salida di e reunion publico. Mantene Aruba sigur, uzando hermentnan necesario, ta masha importante. “Mester adelanta e pensamento di e criminalnan. Nos ta contento cu e ley aki a pasa.”
