Diasabra anochi alrededor di 11:15pm a sosode un accidente na Kudawecha. Na e sitio a constata cu un auto marca Mitsubishi a ranca spiel di un auto modelo Mark X. Chauffeur di e Mark X a conta cu e otro auto tabata core masha irresponsabel, a hala den su banda y del su spiel.
Mirando actuacion di e chauffeur, Polis a lag’e supla pa controla su nivel di alcohol den su rosea. Ey a constata cu e chauffeur tabata burachi y no apto pa participa den trafico. A detene y hib’e Warda di Polis pa present’e dilanti Fiscal auxiliar pa dicidi riba su encarcelacion.
Ta considera stuurmento di auto burachi como un crimen pa cual ultimo lunanan ta nota cu Polis ta detene e chauffeurnan mesora. Mayoria biaha ta pa pasa nan wayaba den cel. Pero den caso cu causa un accidente burachi, e consecuencia por ta diferente.
Remarcabel ta cu ultimamente Polisnan ta hopi mas atento pa chauffeurnan burachi den trafico y ta detene nan mesora. No obstante tantisimo cobertura y atencion di comunidad na e fenomeno robes aki, toch ainda tur dia tin chauffeur cu ta risca nan libertad dor di subi auto y purba stuur siendo burachi.
