Presidente di SMAC, Shannon Henriquez, tabata masha satisfecho na final di e Parada di Flambeu 2019, cu a sali na ora y a caba na ora. El a papia cu Cruz Cora, DOW y Polis y tur tambe tabata contento con tur cos a cana. Ta considera cu e temporada di carnaval a ranca sali riba bon pia.
Specialmente e empleadonan di DOW tabata masha contento pasobra dor cu no tabatin Last Lap, cu e participantenan no tabata keda patras pa stroba e trahadonan di kita e baricadanan. Esey a resulta masha positivo pa e trabou cu DOW ta desplega despues di parada, mesun cos cu Serlimar cu mester haci e cayanan limpi ora cu e parada caba di pasa.
Pa loke ta e retonan pa e ultimo grupo di e parada, esta Le Groove, Shannon Henriquez a aclaria cu e mesun Le Groove a cambia su number y a scoge pa bay ultimo. Ora a saca lot e no a haya e ultimo number, pues ta e mes a pidi pa bay delaster. SMAC a reuni cu Polis y tur otro instancia pa sigura cu ta duna Le Groove un man pa garantisa cu publico no ta djis drenta na final strobando e grupo. Shannon Henriquez a bisa cu personalmente el a mira cu e ekipo di siguridad di Le Groove a haci un bon trabou. Pero, cu despues di Royal Plaza por a constata tambe cu hopi participante den otro grupo, a opta pa join Le Groove pa e pida cu a keda di e parada. Esey ta un tendencia lamentabel pasobra e ta stroba esunnan cu si a paga pa ta cu Le Groove den grupo.
Na tur SMAC tabatin 40 boluntario riba pia pa duna un man pa guia e parada di Flambeu for di inicio te final. E ta un proceso cu ta rekeri hopi hende pasobra constantemente ta presenta buraco y si no cera nan, e ta haci cu e parada ta caba mas lat ainda.
Den e dianan nos dilanti lo sigui reuni cu e partnernan y e lidernan di grupo pa haya mas “feedback” di con e parada a transcuri y si tabatin otro problemanan cu SMAC kisas no tabata na altura di dje.
