Ta bon pa bisa cu hopi di e detencionnan no tabata entre e participantenan, sino di problemanan cu a surgi banda di caminda. Asina mes a nota cu algun participante, bisti cu nan flanel di e grupo, tambe no a comporta debidamente cu a costa nan libertad. E cantidad exacto di detencion no ta conoci ainda, pero Polisnan a sigura cu ta riba 10 persona a haya nan ta bishita Warda di Polis di forma inespera.
Manera ta conoci, Ministerio Publico a podera Polisnan pa aplica e maneho di “Faya Bo Haya” durante e Parada di Flambeu 2019. Esey ta nifica cu cualkier falta di cumplimento na nos reglanan y leynan di ordo publico, por causa bo detencion. Ta aplica un formula di “fast track” den cual e multa ta regla adelanta caba y e Fiscal Auxiliar di Polis mes ta duna e multa. E sospechoso tin dos opcion, paga e multa “cash” of keda cera te despues di parada.
Mayoria hende ta probecha di e oferta y ta saca placa paga mesora pa nan por bay nan cas. E multanan relaciona cu Faya Bo Haya ta hopi mas cu normal, den un esfuerso pa Husticia inspira miho comportacion bou di publico. Hopi biaha alcohol ta hunga un rol prominente den mal comportacion cu na final ta caba den detencion.
E mesun maneho aki lo sigui vigente durante tur e paradanan y eventonan grandi di Carnaval 65. Ta conseha publico carnavalesco pa atene Bo mes na reglanan y instruccionnan di Polis pa evita detencion innecesario.
