Recientemente a tuma luga un charla cu a toca tema e salud di e riñon. Internista y nefrologo, dr. Romeo Kock, a splica cu mester a pone stoel extra, mirando e interes grandi cu tabata tin pa e charla aki. Esey ta haci cu e organisadornan a bira sumamente contento pa e interes cu e pashentnan ta mustra pa atende un charla asina cu ta bon pa nan salud.
Dr. Chowdry tabata orador durante e charla. El a contesta tur pregunta. E otro miembronan di e staff di Hospital, a contribui pa haci e charla un exito.
Situacion di salud
E situacion ta bayendo den un fase berdad cu ta mas y mas alarmante. E grupo di hendenan cu tin mester di tratamento di dialyse ta keda crece na Aruba. Ta asina hopi awo cu en realidad cu e tratamento di hemodialyse na Aruba, cu ta inclui Dr. Horario Oduber Hospital y e clinica na Imsan ta full yen.
Casi no tin luga mas. E crecemento ta sigui, segun dr. Kock. Si compara Aruba cu e resto di mundo, nos ta den top 10 di paisnan cu hendenan cu tin mester di dialyse relativo compara pa cuanto hende ta biba riba e pais.
E ta un situacion cu pa yam’e alarmante, e ta yegando eynan. E cos di mas importante ta pa hendenan realisa con importante ta pa nan cuida pa nan riñonnan. Mester ta hopi conciente di bida, di salud. E malesa di riñon ta wordo causa door di hendenan cu ta sufri vooral di presion halto y malesa di sucu, esta diabetes.
Esey ta e dos malesanan cronico cu ta causa daño na e riñonnan. Si bo sa cu bo ta sufri di presion halto of bo ta sufri di diabetes, ta importante pa bo cuida bo curpa hopi bon. No warda pa bo tin sintomanan pa bo sintibo malo y cuminsa tuma pildo of usa bo remedinan bon. Haci’e manera debe ser, manera cu bo dokter ta splicabo. Bo mester sa kico ta e number cu ta importante. Ora cu bo tin presion halto, bo mester sa cu bo presion mester ta menos cu 140/90, e ora e ta bon. Bo no mester warda pa bo tin dolor di cabes pa bo tuma pildo. E ora ta mucho laat.
E problema cu nos tin ta cu e malesanan cu ta causa problema di riñon, no ta duna sintoma. Ora cu bo riñonnan cuminsa daña tampoco no ta duna sintoma. Si bo warda pa bo sintibo malo pa bo bay busca atencion medico, e ora bo ta hopi laat.
Esey ta e cos di mas importante pa cuminsa biba mas saludabel, preveni natural si por. Haya complicacion di sucu y presion halto, esey ta motibo pa bo cuminsa biba gezond. Sobrepeso tambe ta den bo mesun man. Corda biba mas saludabel posibel, haci ehercisio a bo preveni obesidad. Si bo haya esey bo tin mas chens di haya presion halto of sucu. Si bo tin e malesanan ey, cuida bo mes bon, bay bo dokter, tuma bo remedinan como debe ser. Sin cu bo sa, si bo no haci esey y bo ta kere bo ta sintiendo bo mes bon, toch e presion ta mucho halto, e sucu ta mucho halto y ta keda causa dañonan cronico cu despues bo por haya problemanan despues manera problema di riñon, ataca di curason, stroke, etc. Nos no por cura e malesanan aki ora cu nan ta den e fase asina avansa.
Tin pashent cu ta menos cu 30 aña. Tin hende cu ta basta jong. Tin malesanan tambe cu por bin cu no tin nada di haber cu sucu of presion halto cu si bo tin mala suerta bo ta haya e malesa ey y toch causa daño na bo riñonnan.
