Departamento di Aviacion Civil di Aruba a anuncia awe cu desde mañan ta prohibi tur avion di e modelo Boeing 737-MAX, despues di e accidente na Etiopia. E decision aki ta como un precaucion preventivo, sperando riba investigacion tumando luga. Ta dos avion a cay den un tempo cortico sin un bon splicacion di e motibo di e desgracia. Pa Aruba e decision drastico aki lo no tin mucho problema pasobra ta e aeroliñanan Canades so ta uzando e avionnan aki riba nan ruta pa Aruba. Nan lo mester cambia avion mientrastanto. Como tal no ta spera cancelacion of retraso dor di e medida aki.
Di otro banda e regulador di siguridad di aviacion di Union Europeo, a suspende diamars tur e vuelonan di e avionnan Boeing 737 MAX di e fabricante Mericano despues di un accidente na Etiopia unda cu 157 persona a fayece.
A anuncia e decision despues cu Gran Britania, Alemania y Francia a uni na un ola di suspension di e avion, den cuadro di e accidente di diadomingo y a sigui rapidamente pa un decision similiar di India, loke a lanta e presion pa Merca sigui nan ehempel.
E tres aerolinanan Mericano principal ta sigui respalda e modelo di Boeing, apesar cu e cliente, sindicato y algun politico a expresa nan duda riba e siguridad.
E Administracion Federal di Aviacion di Merca (FAA) ta un di e unico reguladornan importante cu no a suspende e vuelonan di 737 MAX, despues di dos desaster cu a envolvi e mesun avion den algun luna.
Boeing, e mayor fabricante di avion na mundo, cu a mira con miles di miyones di dollar di su balor riba mercado a somenta, a bisa cu nan ta compronde e medida di e paisnan, pero cu nan ta mantene “tur confiansa” den e 737 MAX y cu siguridad ta nan prioridad.
