Aunke cu a purba tur forma pa evita un caso penal den corte, toch na final, debi cu un di e partidonan no kier tende di “yega na deal pafo di corte” a pusha pa e caso yega dilanti hues. Wel, e caso cu mester a tuma luga for di aña pasa awo lo sigui otro siman diahuebs, dia 23 di maart 2023 pa 8:30 am. Ey tin cuater sospechoso cu mester presenta pa duna cuenta di nan acto.
E caso ta hala atencion pasobra un di e sospechosonan, esta Kevin Wever, ta yiu di minister-president y alabes lider di partido MEP, mr. Evelyn Wever-Croes. E otro sospechosonan ta Nigel y Chris Williams, yiunan di e lider di partido Pueblo Prome, Michael Williams. Y Yowalfre Torres-Mendez, cu ta pareha di e yiu muhe di minister-president, Claudine Wever, kende tambe tabata cu Kevin durante e pelea.
Abogadonan: No deal
Abogado cu ta defende e yiunan di Michael Williams ta mr. Peter Mohamed mientras cu e bufete di abogadonan Croes, Wever & Ruiz ta defende e yiu di Prome Minister di Aruba. A purba tur forma pa por a yega na un “deal” pa e caso bira un TOM Zitting of pa regla cu Azia Restaurant direct, pero famia Williams a para riba cu nan ta inocente y cu Wever tin cu carga e culpa aki su so den corte. Y mirando cu fiscal tabata habri pa negocia, famia Williams no a confia e proceso penal mas y a insisti mas ainda pa e caso yega corte pa un hues imparcial mira e acusacionnan y castiga esun(nan) cu a faya.
Kevin Wever a protesta contra su “dagvaarding”
E no ta un opcion facil, pero den e caso aki, e ta e unico opcion pa Kevin Wever, den su afan pa prueba su inocencia y evita consecuencia. Pero, e kier haci esaki prome cu yega dilanti un hues. Wever kier evita cu e ta den e caso mes y p’esey, a reta Ministerio Publico den Corte Comun di Caribe Hulandes, cu su base principal na Corsou, pa purba logra cu tres hues ta destrui e citacion (dagvaarding) cu fiscal a saca p’e, den e caso penal di bringamento y destruccion di propiedad den Gusto y Azia Restaurant. Esaki no ta un caminda comun cu e sospechosonan sa cana, pasobra e chens pa bo gana un fiscal prome cu e presenta e acusacionnan contra bo, ta chikito. E tres huesnan a revisa e caso y a dicidi cu tin base penal pa e caso por sigui y no a tuma e protesta di Wever den consideracion. Cu esey, e no tin mas opcion cu bay dilanti hues, den un procedura publico y defende su mes contra un fiscal cu lo bin cu demanda pa husg’e y e otronan tambe.
MEP, AVP y Pueblo Prome ta den wega
Den caso cu opta pa un “tom zitting”, den cierto forma e por cumbini tur banda. Chris Williams ta pareha di Gerlien Croes, un parlamentario prominente di partido AVP y yiu di Michael Williams di Partido Pueblo Prome. Di otro banda Kevin Wever ta yiu di Evelyn Wever-Croes, minister-president y alabes lider di partido MEP. Pues den caso cu yega na un “settlement” pafo di corte, lo tin beneficio politico pasobra no tin sentencia, no tin sushamento di bon nomber, no ta tacha integridad, etc. Pero, un di e partidonan ta sinti cu si opta pa un “settlement” kiermen cu nan a admiti nan culpabilidad, loke nan ta para riba cu no ta asina y como tal lo no “settle” nada cu ningun fiscal!
E caso mes
Tabata diadomingo dia 14 di november 2021 cu tabatin un pelea den baño di Gusto Nightclub entre Nigel Williams y Kevin Wever. Esun ta acusa e otro di a coba su mama y scupie. Siguridad di dicho club a saca e bringadonan porta ‘fo mesora. Pero en bes di bay cas, a opta pa e ora bay come den Azia Restaurant y no a dura mucho cu e gang a topa cu otro atrobe. Ey a bolbe tira sla y den e proceso a kibra boter tira den e luga. Den e proceso a corta chef di e restaurant inocentemente, te cu ambulance mester a presenta na e sitio y despues transporta e empleado pa hospital pa ricibi tratamento medico avansa.
