Minister di Turismo y Salud Publico, Dangui Oduber, awe mainta a sali di bishita na scolnan cu ta den preparacion pa celebracion di nos dia nacional. Un di e scolnan cu a ricibi bishita di e mandatario ta Scol Basico Washington na Noord.
Studiantenan a spera yegada di e mandatario y a para den fila pa salud’e. Tur kier a papia algo cu ne, tene su man of sikiera dal un saludo di mokete.
E mandatario a bisa na final di a keda impresiona cu e preparacionnan andando na e scol. No solamente e entusiasmo di e studiantenan pero tambe sin lubida e energia y creatividad cu e docentenan ta hinca den e celebracion aki. Cu poco recurso disponibel, e docentenan ta logra saca lo maximo di e studiante pa mustra su amor pa su pais.
Diasabra awor ta dia 18 di maart y Aruba ta corda cu 47 aña pasa, na 1976, a hisa nos bandera nacional pa prome biaha den stadion cu awendia ta dedica na defunto Guillermo Prospero Trinidad.
Celebracion di nos dia nacional, dia 18 di maart, no ta algo di semper. Tabata na aña 1985 cu Conseho Insular di e tempo ey a boga pa elimina dia 15 di december, e fecha cu tabata celebra Dia di Reino (Statuutdag) y na su luga cambie pa 18 di maart como un dia liber na nivel nacional. Pues e aña aki ta bira di 38 aña cu ta celebra 18 di maart como un dia nacional.
