Diabierna 9 december 2022 Secretaria di Estado van Huffelen a contesta Lider di Fraccion Accion 21, Parlamentario Miguel Mansur, su carta di 24 october 2022. Den su contesta na Mansur, van Huffelen ta declara cu ainda tin preocupacionnan serio tocante sostenibilidad di Aruba su finansas publico.
E cambionan anuncia na presupuesto 2022 cu a sosode despues di CAft su conseho ta e motibo cu Rijksministerraad no a implementa e recomendacion pa un aanwijzing segun e Secretaria di Estado. Despues cu gobierno a modifica presupuesto di Land Aruba bao menasa di un aanwijzing e deficit lo ta dentro di e meta estableci y consecuentemente Rijksministerraad a dicidi di no duna un aanwijzing.
Den un carta na Gobierno di Aruba, van Huffelen a expresa preocupacion di Rijksministerraad tocante e estado di finansas publico di Aruba y a pidi Gabinete Wever-Croes II incorpora e cambionan anuncia den un nota di cambio na Presupuesto 2022 cual a sosode.
Loading…
Reload document
Open in new tab Secretaria di Estado tambe a referi Parlamentario Mansur na su carta di 21 october 2022 na Tweede Kamer den cual e ta anuncia cu ela pidi Aruba haci cambionan na Presupuesto 2023 pa cumpli cu e normanan di entre otro un surplus di 1%. Den dicho carta van Huffelen a pidi Aruba duna prioridad na discusion di e rijkswet RAft mirando cu e LAft ta caduca fin di 2023 y e prestamonan di Hulanda ta caduca 10 october 2023.
Dia 21 november 2022 Mansur a ricibi un carta di Griffier di Commissie Koninkrijkrelaties Tweede Kamer indicando cu dicho Comicion a instrui Secretaria di Estado pa manda nan un copia di su contesta na e Lider di Accion 21 pa dicidi si nan lo trata su carta mas leu. Di su banda Mansur ta agradecido pa e contesta di Secretaria di Estado y Comicion Koninkrijkrelaties Tweede Kamer. Sinembargo e ta lamenta cu cumplimento cu e normanan lo bin a base di mas medida luga di reduccion structural den gastonan di gobierno.
Loading…CAft, IMF y otro instancianan tin añas ta pidi gobierno reduci su gastonan di un forma structural. Aruba ya caba tin algun di e nivelnan di belasting mas halto na mundo. Tambe nos tin algun di e gastonan di produccion mas halto di nos region, esey ta sigui impedi no solamente nos crecemento economico pero tambe diversificacion di nos economia.
Administracion publico mester sosode di un manera mas eficiente y menos costoso si nos kier logra un economia dinamico cu miho oportunidad pa tur, Mansur a declara.
