Con bo ta sinti bo curason ora abo por haci un otro hende feliz, con bo ta sinti den bo curason, ora abo por pone un mucha hari. Y haci un hende grandi contento pasobra locual e no tabatin, of locual cu e no por a alcansa a yega na su porta. Bo tabata sa cu esey ta un mandato di Dios y e ta para skirbi den Mateo 25 :34-46.
Iglesia Pentecostal di Aruba situa net dilanti di Macro San Nicolas , tambe conoci como Dr. Scheapmanstraat 18 ta hopi consciente di esey, p’esey nos kier invita bo pa diasabra 17 di december 2022 for di 7:00 am te 3:00 pm pa bo bishita nos caminda nos lo ta entrega paña pa mucha, hende grandi, baby, sapato den bon condicion y tambe paña nobo, gratis, pornada, free, como regalo, as a gift, als een geschenk.
Y si bo ta falta algo den bo cas, manera semper nos tin e vlooienmarkt cu articulonan hopi barata, na e prijs cu ta cumbini tur saco.
Pa 11:00 am nan cushina lo habri pa henter pueblo di Aruba y specialmente, pa esunnan cu riba diasabra ta bezig ta verf, chapi of haci cura limpi, nos tin e miho sopi cu ta duna energia, forsa y curashi , nos tin tanto sopi di carni, como sopi di galiña pa solamente 15 florin , y tambe galiña stoba pa solamente 15 florin.
Diaranson 14 di december for di 5:00 pm y tambe riba diabierna 16 di december nan lo ricibi di esunnan cu kier duna paña y comestibel pa asina nos por bishita hende den necesidad, y haci nan tambe feliz, no lubida cu comestibel nunca no ta di mas, y corda cu no por trece nada cu tin di warda den frishider. Tur locual bo curason ta bisa bo pa bo por yuda otro cu ne ta bon bini, tambe nos tin un lista chikito di articulo, cu bo por haya cerca nan y asina bo por busca y trece, corda check fecha di vence di comestibel, y e pañanan mester ta limpi y den bon condicion.
Durante siman di 19 di december pa 23 di december nan lo bishitando hogar y asina bendiciona esunnan cu ta den necesidad.
Por tuma contacto cu nan of manda WhatsApp na 7403237 / 6619150 / 5698426. Tambe nos por whatsApp bo e lista di comestibel. Tambe nan por entrega bo sopi of cuminda na cas of negoshi asina e pedido ta di dies of mas.
Si bo kier bendiciona un famia cu sopi of galiña stoba, nan lo entreg’e pa bo, pero bo pedido mester alcansa 10 unidad. Nos tur ta na altura di e necesidad cu ta biba den pueblo,p’esey nan ta conta cu bo sosten.
Felicidad ta pa tur hende. Iglesia Pentecostal ta warda bo y Dios bendiciona bo ricamente.
