Diadomingo, despues di e traspaso di mando, e cayanan di Oranjestad tabata yena di fantasia, alegria y color, cu e Parada di Mucha, cual a sali pa exactamente 1:00pm. Presidente di SMAC, Darren van Ommeren tabata hopi contento di con e parada a cana. Tabatin un total di cuater grupo: T.O.B., Grupo Champagne, Don Flip Carnival Group y Noord Carnival Group.
Despues di dos aña cu tin un carnaval bek, cu e pueblo por disfruta di dje bek, e tabata tin su retonan, cual a hacie dificil. Tur hende a sali gosa, disfruta, tur hende a sali apoya, esey ta conta. ORa cu tur hende sali, aporta, apoya y gosa di loke e Carnavalista-, e organisadonan ta trece padilanti ora di subi caminda.
Touch of Brasil (TOB)
E aña aki, TOB Kids a bin cu e tema ‘E cas, e cas ta bon traha’, cual ta un cantica cu tur mucha a yega di canta tempo nan tabata chikito. Lisette Cheung, lider di e grupo a indica cu hopi di e muchanan cu a cuminsa cu nan, tempo cu nan tabata mucha, awe a crece y ainda ta cu TOB ainda. Diadomingo nan a subi caya c’un total di 150 participante. Otro aña nan lo cumpli 15 aña. T.O.B. Kids tabata acompaña musicalmente pa ‘N Fuzion.
Don Flip Carnival Group
Un di e otro gruponan cu a join e Carnaval di e aña aki, tabata Don Flip Carnival Group. Penelope Tromp,lider di Don Flip Carnival Group, a splica cu nan a bin c’un total di 75 mucha den massa y 6 den seccion. Como Don Flip, nan tin 50 aña caba di existencia, pero 25 aña den Carnaval di Mucha. Youth X-treme tabata e banda cu a pone e muchanan di Don Flip baila sin fin.
Champagne
E aña aki nan tabatin en total, cu helper y tur, nan tabata tin 250 hende riba pia. Betzabeth Rasmijn, lider di e grupo, a splica cu nan tin 100 mucha den massa, 8 seccion, di locual 6 dilanti, dos patras di massa plus e bailarinnan. E seccionnan ta Maribel su cas, despues ta haya Maribel, despues Antonio, sigui pa Don’t Talk about Bruno, despues e bela, ora cu e paga. Ta haya e massa, cu ta e comunidad di Colombia. Mas despues ta haya e reina di Theresita School, cu a join Grupo Champagne, seguidamente ta haya e cas un biaha mas, ora cu e lanta bek, cual ta e final.
Oficialmente Grupo Champagne tin 25 aña di existencia. Compara cu e otro añanan, ta wak e grupo hopi mas chikito, den parada di blaas tambe hopi di e participantenan aki tabata kier a join den e parada, pero door cu nan pañanan ta bin di afo, esaki no tabata posibel mas. Pero e ta spera si cu pa otro aña, e por tin un otro bunita grupo riba caminda. Tsunami tabata e banda cu a acompaña Grupo Champagne den e parada.
NOORD (The Little Stars)
Sharline Farro, the Little Stars, diadomingo tabata tin 10 participante. Farro a indica cu nan tin 51 aña como grupo. Ta trata di e grupo di Amy’s, su mama, hunto cu Titi y Imelda Eckmeyer. Su persona mes a cuminsa cu 1 aña den Parada di Noord. Noord tabatin su gruponan di scol, manera Colegio Bon Bini, Colegio Ora Ubao y tambe diferente scolnan. N.B.O. tabata e banda cu tabata tin na su encargo, pa pone ambiente cerca e muchanan participante di Noord Carnival Group.
Polis: Contento
Vocero Policial, Lito Lacle, tabata sumamente satisfecho con e parada a bay. Tabata tin 100 polis riba pia pa asina zorg p’e siguridad di e pueblo di Aruba. Liliana Rasmijn a indica tambe cu e publico a comporta su mes debidamente y ta spera cu esaki sigui asina p’e proximo paradanan.
