E siman aki Hof a revela e cifranan di 2022 y loke cu a resalta ta cu e cantidad di e casonan entrega na corte den aña 2022 ta mas cu esunnan di 2021. Pero asina mes no a yega ainda na e cantidad di casonan Pre COVID. Ta papia aki di instroom (entrada) y uitstroom (sentencia).
PROME INSTANCIA
Pa loke ta aña 2022 e cantidad di e casonan entrega na Corte di Prome Instancia a aumenta cu 16%, den comparacion cu aña 2021, for di 31.559 pa 36.544. E cantidad di e casonan aki ainda ta bou di e nivel di e periodo prome cu Covid (2018-2019).
A analisa e cifranan y a constata cu den tur area tabatin aumento den e cantidad di e casonan nobo entrega, sinembargo principalmente den corte administrativo y penal (ambos cu 17% di aumento den e casonan nobo). Den e ley administrativo e aumento ta principalmente visibel den e cantidad di e casonan di belasting na Aruba y Corsou. Na aña 2022 tabatin un total di 36.315 sentencia cu a sali. Esaki ta un aumento di 14% compara cu aña 2021, cu ta den e mesun tendencia cu e aumento di e casonan cu a drenta. Mescos cu den e casonan nobo, tin un aumento den tur area, pero principalmente den Corte Civil (11%) Corte Administrativo (2%) y Penal (17%). Den ley civil a logra saca mas caso door cu a aumenta e capacidad pa deshaci di e casonan atrasa.
APELACION
Total di e casonan cu a drenta nobo den apelacion, pa loke ta aña 2022, tabatin 1.148 caso, cu ta un aumento chikito di 1% compara cu na aña 2021. E cantidad di e casonan nobo di bestuursrecht a aumenta cu 11%, pero e casonan civil a baha cu 4% y e casonan penal apela a keda na e mesun nivel. E sentencia den e casonan den beroep tabata 1.304, cu ta un aumento di 19% en comparacion cu aña 2021. E echo cu a logra saca mas caso tabata debi principalmente na e casonan di belasting na e islanan BES y Corsou.
