Diarazon dia 27 di juni, e federacion di esgrima, Scherm Amateur Bond Aruba (S.A.B.A.) lo organisa e campeonato di Copa Thomas 2018, dedica na e legendario atleta di esgrima Arubano y alabes atleta Olimpico bou di e constelacion Antiyano, Austin Thomas, awe den felis memoria.
E inscripcion lo ta 5or di atardi mientras e competencia mes lo inicia pa 6or di atardi na IBISA San Nicolas. E lo bay ta un competencia di “wapen & degen”.
Mester bisa cu e atletanan di e tres clubnan di esgrima na Aruba esta Universal Fencing Club, Scherm Club Brazil y Don Bosco Knights ta duna un berdadero espectaculo den e deporte di arte martial. Tin varios prospecto y talento nobo den e deporte di arte martial mientras cada dia e deporte ta crece den atendencia y bira mas popular bou di nos hubentud. Na nivel internacional nos atletanan di sgrima ta prestando den bon forma unda aña pasa Aruba a triunfa den e asina yama Dutch Caribbean Fencing Championship 2017, caminda nos atletanan a logra e mayoria premionan disponibel. Na banda di competencia, e federacion di esgrima ta traha duro riba e conocimento di nan atleta y coachnan door di organisa workshop cu expertonan di exterior unda ta ofrece diferente tayer y traha riba e aspectonan di esgrima. Nan ta enfoca riba e agilidad, reflex, resistencia, habilidadnan basico, drills y mas cu claro con pa anda cu e materiaal di esgrima. Tur esaki sin duda ta yuda e deporte dal un stap na e siguiente nivel.
Stichting Sportsubsidie Aruba a subsidia e campeonato di esgrima Copa Thomas 2018 organisa pa SABA y dedica na e legendario atleta Olimpico Arubano, Austin Thomas, awe den felis memoria.
Cumprando weganan di Lotto, e Loteria di Aruba bo ta contribui na deporte riba nos isla. Meta di St. Fundacion Lotto pa Deporte ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.
