Interpretacion y uzo di palabra por pone hende compronde cos diferente tin biaha, cu por crea un confusion sin cu tin mester. Den e caso aki, ta trata e articulo recien (dialuna 25 juni) riba scol multilingual di parlamentario pa partido MEP, Sue-Ann Ras.
Den e articulo, hopi a interpreta e contenido den un forma diferente cu cual a skirbi e articulo. E meta di e articulo tabata pa mustra netamente cu e resultadonan escolar di e 2 scolnan multilingual tabata mes bon of miho ainda cu tur e otro scolnan basico ‘regular’ tradicional na Aruba. Pues cu mester tene cuenta cu e scolnan multilingual ta riba mes nivel of te hasta mas halto, mientras cu e dos scolnan aki, no a haya 100% di sosten den ehecucion.
BRUHAMENTO
Loke a keda malinterpreta den e articulo anterior, ta e analisis entre e dos tipo di scolnan, unda cu hopi a interpreta cu e scol multilingual ‘no ta dunando e resultado desea’. E frase ‘Esaki ta un señal hopi alarmante, mirando cu ta trata pa 6 aña largo, brinda un sistema di educacion na nos muchanan, cu no ta dunando e resultado desea’. Loke cu Ras tabata referi na dje, tabata e otro scol (no multilingual) cu tabata duna e señal robes, pues cu tur e otro scolnan basico ‘regular’ tradicional, a pesar di ta haya 6 aña idioma Hulandes como idioma di instruccion y uzando metodo di idioma materno Hulandes, nan no a duna un miho resultado desea, ya cu loke nan a score en general na Aruba ta 6.2 y e dos scolnan multilingual a score hunto 6.0 pa idioma Hulandes y riba matematica, unda cu tambe ta haci uzo di idioma Hulandes hopi mas, e scolnan regular tradicional a score un promedio di 6.3 y e dos scolnan multilingual 6.7.
“Mi ta spera cu, e aclaracion aki ta clarifica cualkier malcomprendemento cu por tabatin y cu mi ta cuestiona mas bien e tipo di enseñansa regular tradicional y no scol multilingual!”, Ras a finalisa bisando.
