Den fin di siman tabatin e tremendo apertura di e Campeonato ABBA na Joe Laveist Ball Park. Tabata un evento cu a conta cu hopi expectativa y un publico bon anima cu a bin presencia e bunita ceremonia di apertura.
Greg Croes, miembro di e directiva di ABBA a duna di conoce cu tabata tin varios siman trahando duro pa asina e evento por tabata un exito. El a splica
cu tabata un apertura basta colorido. “Nos tabata tin un Joe Laveist basta yen cu fanatico. Pa e peloteronan tabata un honor pa desfila dilanti di un publico grandi asina”. E plannan pa awo ta pa e campeonato cuminsa full swing den e weekend aki. Durante e ceremonia di apertura a inicia cu un partido entre e campeon di aña pasa Marlboro Red Machine contra di ATCO Indians. Dia 9 di September e campeonato mes ta cuminsa cu tanto Liga Menor como Dobel A. E campeonato aki ta keda dedica na 2 persona cu ta pelotero Franklin Danies, y Milton Croes, Presidente di e team di Marlins. Nan ta dos baluarte den mundo di baseball y ta p’esey cu ABBA a rindi nan un homenahe mereci.
Franklin Danies a expresa cu semper el a hunga den tur posicion pero semper ta reconoce pa hunga como shortstop. Tabata un sorpresa pe, a expresa, ora cu el a haya sa cu e ta wordo reconoci. Baseball tabata su bida. El a dedica masha hopi tempo na e deporte aki. “Mi a sacrifica hopi tempo cu mi famia, trabao mes pa e hunga bala. “Pa mi ricibi esaki ta e reconocimento di mas grandi, special di ABBA”, a manifesta. Su conseho pa e hobennan ta dedicacion, amor, respet, disciplina. Eseynan ta cardinal. Sin nan y sin amor pa loke bo ta haci bo no ta yega leu”, a señala. Banda di esaki, Milton Croes a manifesta cu pa hopi aña el a hunga baseball na San Nicolas. Aworaki el a cumpli 40 den mundo di baseball. Actualmente e ta coach. Segun Milton Croes, baseball ta un deporte cu bo tin cu train tur dia y nan ta conseha e muchanan pa nan haci algo tur dia den e deporte aki. E mes tabata train 3 bes pa dia pa e por a yega leu. E homenahe aki tabata un honor pe. “Mi a kere nan a lubida mi, pero no tabata asina”, Croes a finalisa bisando.
