Na aña 2022 Rainbow Warriors Core Foundation a crea un campaña anual cu ta core di april 8 te cu juni 8, yama “Eight to Eight, Because Our Planet Can’t Wait”.
E idea ta cu mester di un campaña cu ta dura mas cu solamente algun dia den aña manera Dia di Tera, Dia Mundial di Medio Ambiente pa enfoca riba e necesidad urgente pa accion inmediato y continuo pa cumpli cu metanan pa combati cambio climatico.
Obhetivonan pa Desaroyo Sostenibel (SDGs) y proteccion mundialmente di biodiversidad y ecosistema, vital pa seguridad alimentario y salud global.
Nos planeta no por warda mas, pasobra si ser humano tarda pa cumpli cu deadline urgente, lo ta demasiado laat pa scapa Planeta Tera, asina e activista ambiental Milton Ponson di Rainbow Warriors Core Foundation ta bisa.
EIGH TO EIGHT, BECAUSE OUR PLANET CAN’T WAIT
E campaña aki ta core anualmente di april 8, te cu juni 8. E tin un dobel enfoke.
DECADANAN INTERNACIONAL Y DI NACIONAN UNI
Lo cubri e tematicanan di lo siguiente:
.Decada Internacional di Lenganan Indigena (2022-2032)
.Decada di Nacionnan Uni pa Embehecimento Saludabel (2021-2030)
.Decada di Nacionnan Uni pa Restauracion di Ecosistema (2021-2030)
.Decada di Nacionnan Uni di Ciencia Oceanico pa Desaroyo Sostenibel (2021-2030)
.Decada di Nacionnan Uni di Agricultura Familiar (Cunucu, agricultura escala chikito) (2019-2028)
.Decada Internacional pa Accion “Awa Dushi pa Desaroyo Sostenibel” (2018-2028)
.Decada di Nacionnan Uni di Accion pa Nutricion (2016-2025)
.Decada di Nacionnan Uni di Energia Sostenibel pa Un y Tur (2014-2024)
DIANAN INTERNACIONAL
• Dia Internacional di Vuelonan Espacial Tripula, April 12
• Dia Mundial di Creatividad y Innovacion, April 21
• Dia di (Mama) Tera, April 22
• Dia Mundial di Buki y Derecho di Autor, April 23
• Dia Mundial pa Siguridad y Salud na Trabou, April 28
• Dia Mundial pa Libertad di Prensa, Mei 3
• Dia Mundial di Parha Migratorio, Mei 11
• Dia Internacional di Salud di Planta, Mei 12
• Dia Mundial di Telecomunicacion y Sociedad di Informacion. Mei 17
• Dia Mundial di Abeha, Mei 20
• Dia Mundial pa Diversidad Biologico, Mei 22
• Dia Mundial di Bicicleta, Juni 3
• Dia Mundial di Medio Ambiente/Dia Mundial pa Combati Pesca Ilegal, No Raporta y No Regula, Juni 5
• Dia Mundial di Siguridad den Preparacion/Produccion di Cuminda, Juni 7
• Dia Mundial di Oceano, Juni 8
Antesala pa campaña di 2024: Dia Mundial di Salud, 7 april 2024 tema “mi salud, mi derecho”
Pasobra salud ta un tema crucial di desaroyo sostenibel y liga tambe na medio ambiente, cada aña nos ta uza e tema di Dia Mundial di Salud, cu ta ser observa 7 april tur aña, den e antesala di nos campaña.
E tema pa 2024 ta “My Health, My Right”, “Mi Salud, Mi Derecho”
Mundialmente cada dia mas e derecho di acceso na servicio di salud pa miyones di hende ta bou menasa.
Malesa y desaster natural ta resalta como factor principal pa causa di morto y incapacidad fisico.
Conflictonan nacional y regional ta devastador pa miyones di hende, causando morto, dolor, hamber y afliccion y stress psicologico.
E kimamento di combustibel fosil ta simultaneamente causando cambio climatico y alabes kitando nos derecho pa inhala aire limpi, cu polucion di aire tanto pafo y paden den edificio y cas cobrando un bida cada 5 segundo riba Planeta Tera.
E Conseho di Organisacion Mundial di Salud pa Aspectonan Economico di Salud pa Un y Tur a constata cu por lo menos 140 pais ta reconoce salud como un derecho humano den nan constitucion. Sinembargo paisnan no ta pasando of aplicando legislacion pa garantisa e derecho pa acceso na servicio di salud.
Esaki ta splica di con por lo menos 4.5 biyon hende, mas di mita di e poblacion mundial no tawata plenamente cubri pa servicionan esencial di salud na 2021.
Pa enfrenta e desafionan aki e tema pa Dia Mundial di Salud 2024 ta ‘Mi Salud, Mi Derecho’.
E tema pa e aña aki a ser scogi pa defende e derecho pa un y tur, tur caminda, pa tin acceso na servicio di salud di calidad, educacion, y informacion, y alabes awa potabel sigur, aire limpi, bon nutricion, vivienda adecuado, condicionnan di trabou y ambiental decente y libertad di discriminacion.
SITUACION NA ARUBA
E derecho na salud ta un derecho humano basico. Tur hende mester tin acceso na servicio di salud publico na e ora y luga na unda mester di nan sin obstaculo economico y sin intervencion of triage di asistente di dokter, entre otro pa cita cu specialista.
Aseguro medico general mester provee proteccion financiero y acceso na servicionan basico di calidad, mester saca hende for di pobresa, promove e bienestar di famia y comunidad, proteha contra crises di salud publico, manera e pandemia di malesanan cronico no comunicabel (diabetes, obesidad, malesa cardiovascular, cancer, malesa respiratorio), problemanan psicosocial, cuido di adulto mayor y cuido pa menor den gruponan vulnerabel den sociedad.
Inverti den sistema di salud fuerte ta critico pa un comunidad prospero. Aumenta financiamento publico den salubridad y baha gastonan di “eigen bijdrage” ta salba bida entre otro di adultonan mayor cu ta depende di un pensioen cu no ta permiti gasto halto pa medicina y ta contribui na cumpli cu e SDGs.
Permiti participacion di tur stakeholder den e planificacion di gobierno, revision di progreso y e implementacion di un sistema di salud y seguro medico general, uzando un enfoke riba cuido medico primario pa brinda servicio basico di cuido cu proteccion financiero y pa dirigi esaki riba y atende cu esnan mas den necesidad y pa mehora e salud y bienestar di hende di tur edad den un forma igual.
