Lider di fraccion AVP, Mike Eman ta bisa cu algo cual nan ta bin ta enfatisa basta tempo caba cu e gobierno aki no ta tuma na consideracion ta e impacto social-economico di medidanan tuma. Awor ta papia di un ‘computer model’ pa midi e impacto, cual segun Eman p’e dolor cu bo ta wak den pueblo esaki ta mosterd na de maaltijd despues di tur medida tuma – cu tabata tin cifra caba unda por a wak cu e medidanan aki tin impacto hopi grandi.
Si bo mira cifranan di Centrale Bureau van Statistiek (CBS) cu ta mustra kico t’e deficit di un persona riba un salario minimo den comparacion di locual e tin mester pa sobrevivi, ta wak cu antes e tekort aki tabata 386 florin. Si bo kita e reparatietoeslag acerca tabata unicamente 250 florin – toch tabata un tekort pa hende cu salario minimo, anto esun di awe ta mas cu 700 florin pa motibo di medida tuma.
Tabata tin suficiente cifra di CBS cu ta mustra kico ta e bestaansminimum y impacto di tur BBO aumenta. Cada bes bo aumenta BBO y bisa di reduci e directe belasting, pero un parti grandi di nos comunidad cu tin entrada te cu 2500 florin ta cay den belastingvrijvoed, e reduccion di belasting ey no ta yuda nan pero si tin cu paga aumento barbaro di BBO introduci segun Eman. “Nos no tin hopi confiansa cu un modelo di computer ta bay haci e gobierno aki mas consciente di locual nan ta haciendo. Mi ta kere e cifranan cu nan tabata tin ta bisto caba cu nan ta bay hinca nos comunidad den pobresa.”
PODER DI COMPRA TA STRANGULA CABA
Eman ta splica cu 50% di nos comunidad ta bibando bao di bestaansminimum, ta cifra cu nan tin caba, kiermen pa AVP esaki ta cosmetica pa mustra cu na momento aki tin interes pa poder di compra. “Cu ja ta strangula caba, mas locual e computer aki lo bisa sr. Wever y otro ministernan ta un confirmacion di cual nos ta bin ta bisa nan, cu nan ta strangulando poder di compra.” Eman a papia riba pa kico dus ta importante cu nan a bay Hulanda presenta un sociaaleconomisch cultureel planbureau cu ta haci investigacion completo riba con nos sociedad ta hinca den otro, cuanto hende ta biba riba salario minimo, con e casnan ta reparti, con e comunidad ta reparti riba diferente bario y mas. E ta un plan cu ta tuma e cosnan aki den contexto mucho mas amplio caminda cu e hende tras di e cifra, pa mira e hende tras di e cifranan, e mama y tata cu no tin placa pa paga pa coriente of awa of remedi.
“Esaki ta cosnan cu nos a insisti riba dje. Gobierno un bes mas ta uza cosmetica pa purba na cambia un panorama cu e pueblo ta bibando den dje, cual ta uno di hopi dolor.” E momento aki mester bin cambio hopi grandi den direccion di e gobernacion pa e pais aki, Eman ta keda enfatisa cu mester ‘bolter cos’ pa asina esnan mas afecta cu medidanan haya yudansa.
MAS MEDIDA NA CAMINDA
Tin un pakete rond cu mas medida cu ta biniendo segun Eman pa medio di un rapport recien y esaki ta algo preocupante pa AVP. “Y awor tin un model pa calcula con e medidanan aki ta bay impacta nos pueblo. Nos a hasta tende cu den e model nan ta bay hinca ora bo pone impuesto riba tip, kico e efecto di esaki ta bay ta, di sale tax, etc dus e intencion ta pa bin cu un avalancha di medida ainda.” Eman no ta kere cu un computer ta bay alerta gobierno mientras por mira crudonan nan dilanti por ehempel di hendenan cu no por paga remedi y toch nan ta kita esaki for di nan. “Mi ta kere cu cifranan friu di un computer no ta bay haci un diferencia den e mentalidad cu manera Raad van Advies a bisa, nan no a presenta ni un programa of vision basa rib’e interes y bon comun di nos comunidad. Esaki ta puro cosmetica pa purba tapa e hecho cu nunca a tene den consideracion e poder di compra di nos ciudadanonan.”
