Real Estate Agents na Aruba tambe tabata preocupa cu locual ta desaroyo di Aruba Fair Trade Authority riba e asunto di un comision fiho den mercado di real estate. Nan no a sinta cu Aruba Fair Trade Authority. Solamente algun hende di e directiva di e asociacion cu tin, pero esaki ta causa e ora ey cu e maneho of cambio abrupto tabata tin obhecion. E minister ta bisa cu e consecuencia ta cu hopi hende kier negosha nan contract y bay over na kibra contract cu cierto Real Estate Agents. E desaroyo aki ta fastioso mustrando atrobe cu na ultimo ora ta core tuma decision sin cu tur stakeholders ta riba mesun liña.
Segun mr. Geoffrey Wever, Minister di Asuntonan Economico, tin dos broker a acerca su persona pa informacion pero nada cu el a haya carta masalmente of nada asina. Introduccion di Aruba Fair Trade Authority segun e mandatario tabata un proceso cu a cuminsa desde cu el a bira minister y tabata duidelijk cu e reglanan aki lo bini y keda reforsa desde prome di januari.
“Dus e no tabata algo abrupto. Aruba Fair Trade Authority a scoge pa haci dos investigacion, e Real Estate Agents y supermercadonan. Nan a anuncia esey y ora nan a bay den dialogo cu e sector, y cu tin di nan no a haya oido no ta algo cu mi por confirma. Mi ta na distancia di esaki, e investigacion ta tuma luga completamente independiente y no ta na minister mas pa interveni den esey.”
Si tin algo cu no a bay bon, tur compania tin un proteccion completo den ley y por actua contra esey. E sistema legal ta diseña di tal forma cu tur hende tin su proteccion segun minister Wever.
Pa loke ta e comisionnan, nan tabata tin e practica di pone 5% anto a yega na un entendimento cu cada hende por negosha nan propio comision cual ta nifica cu por negosha mas abao of mas halto depende esfuerso cu bo haci p’e benta di e propiedad. E echo cu tur hende ta bin hunto y bisa esaki ta e porcentahe of prijs y ningun consumidor no tin e caminda pa baha pa negosha no ta permiti den ningun pais moderno. “Nos ta un di e ultimonan cu a haci introduccion di e ley aki caminda cu awor e tipo di afspraak aki no ta permiti mas. Lo tabata tin un periodo di transicion, pero locual mi por a lesa ta cu e asociacion na un forma hopi lihe a yega na un entendimento cu nan ta bay stap-af di e afspraak cu 5% tur ta cobra.”
LICENSIA PA REAL ESTATE AGENTS NO TA NECESARIO
E idea pa un tipo di licencia pa Real Estate Agents, ta algo cu ta sosode na Merca y Europa, kisas lo ta algo pa aplica na Aruba. Na final casi tur hende na Aruba kier bira un Real Estate Agent, dus pa kico no. Segun e mandatario, personalmente na e momento ki e no ta mira e necesidad ey. Pero ta bisa tambe na mesun momento cu esey no ta nifica cu e no lo bin cu tempo. “E ta un mercado liber, bo kier regula menos posibel, menos tipo di Red Tape. Pa bin cu un licencia pa nan ta bira otro Red Tape, otro proceso pa gobierno controla y emiti permiso, y nan tin cu aplica etc,. Na momento aki e peso di regulacion ta suficiente cu bo ta bisa no, si no tin e necesidad real no ban inventa cosnan.”
E consumidor ta sali beneficia di esaki na momento con cos ta awor pasobra bo tin e libertad di bay na un of otro, si bo propiedad ta facil pa bende bo por negosha un comision mas abao, etc,.
