Home » Limpiesa di dump ilegal banda di Zwarte Mangel

Limpiesa di dump ilegal banda di Zwarte Mangel

by Lis

Despues di a ricibi denuncia di pueblo riba rednan social, e team di noticia di 24ora.com a sali diamars mainta trempan pa San Nicolas pa documenta un situacion sumamente desagradabel cerca di e bahada di Golfweg, bay den direccion di Zwarte Mangel. Den e area aki, un buraco grandi a bira un deposito ilegal di desperdicio, creando un bista masha vies den un zona hopi frecuenta pa ciclista, peaton y turista cu ta pasa diariamente den e vecindario. Bureau City Inspector a responde mesora riba e kehonan aki y a manda dos di nan ekiponan pa cuminsa cu e trabou grandi di limpiesa y pone ordo den e area afecta.

N’e sitio mes, funcionario di Bureau City Inspector, Michael Gomez, a dirigi e operacion y a splica e gravedad di e problema. Segun Gomez, nan a bin topa un panorama hopi tristo, ya cu den e buraco tabatin no solamente sushi di cas, sino tambe matras bieu y hasta cadaver di bestia. Mirando cu esaki ta un ruta turistico importante, e situacion ta duna un mal bista pa nos bishitantenan. Debi n’e cantidad enorme di desperdicio acumula den e buraco hundo aki, un solo dia di trabou no ta suficiente pa saca tur cos, motibo pa cual a pidi cooperacion y refuerso di Departamento di Obranan Publico (DOW) pa completa e trabou den e proximo dianan.

Finalmente, Gomez a haci un apelacion fuerte na comunidad pa stop di tira sushi den naturalesa. El a conseha pueblo pa semper pidi un recibo di dump ora di paga un persona of compania pa limpia cura, pa evita cu nan ta benta e sushi scondi den buraco pa spaar placa. Ademas, el a recorda cu tereno coba ta cay bou di Directie Natuur en Milieu y cu tin un area na Barcadera caminda por deposita desperdicio gratis.

Pa mas detaye lesa TREMPAN.

Facebook Live

Bo por gusta tambe

Adblock Detected

Please support us by disabling your AdBlocker extension from your browsers for our website.