Corte Comun di Husticia riba diamars merdia a dicta sentencia den e apelacion den e caso penal contra periodista Nelson Manuel Quarto Cabral de Andrade. Hof a anula e sentencia di Corte di Prome Instancia pa loke ta trata e castigo imponi y a condena e sospechoso na un castigo di prizon completamente condicional di 18 luna cu un tempo di prueba di 3 aña, como tambe un castigo di trabao incondicional di 240 ora.
E sentencia aki ta marca un cambio importante den un caso penal di gran impacto cu ta toca e relacion entre prensa, polis y e secreto profesional (ambtsgeheim) na Aruba.
E caso penal tin di haber cu esun di Corte di Prome Instancia dia 18 di december 2024, unda cu a absolve di forma parti di un organisacion criminal, pero a declar’e culpabel di acusacionnan 1 y 2 y a impone un castigo di prizon di 18 luna, di cual 12 luna ta condicional, cu un tempo di prueba di 3 aña.
Tanto e sospechoso como e fiscal a apela e decision aki di Corte di Prome Instancia. Durante e tratamento den corte, Procurador General a exigi pa Hof confirma e sentencia, excepto pa loke ta trata e medida di castigo. El a exigi un castigo di prizon di 18 luna, di cual 6 luna condicional, cu un tempo di prueba di 3 aña. Di otro banda, e defensa, encabesa pa mr. D.G. Illes y mr. V.A.V. Carlo, a pleita pa un castigo di prizon completamente condicional di 18 luna cu un tempo di prueba di 3 aña y un castigo di trabao di 240 ora.
E hechonan cu a keda proba ta encera violacionnan serio di e integridad di e aparato policial. Cabral de Andrade como periodista a keda haya culpabel di soborno activo di un funcionario di Polis di Korps Politie Aruba. El a brinda e funcionario compensacion den placa, promesa di pago y servicio en cambio pa comparti trafico di radio/portofoon confidencial y informacion interno di polis. Cu esaki, e sospechoso hunto cu e funcionario di polis a haci nan mes culpabel tambe di violacion di secreto profesional.
Hof a bisa scucha radio di polis pa interes personal of pa noticia ta trece riesgonan cu ne pa e siguridad di ciudadanonan y di polis. Y a tene cuenta cu no ta prome biaha.
Cambio di postura
Mientrastanto cu Corte di Prome Instancia a husga un sospechoso cu no a siña suficiente di su pasado, Hof den apelacion a constata un cambio cla den e postura di Cabral de Andrade. Durante e sesion den apelacion, e sospechoso a reconoce explicitamente cu el a actua malo y a expresa arepentimento. Hof a considera cu esaki – maske den un etapa laat – al menos el a demostra comprension den e gravedad di su actonan y a asumi su responsabilidad.
Ademas, Hof a tene cuenta cu e circunstancianan personal di e sospechoso. Un castigo di prizon incondicional segun e defensa lo nifica e fin definitivo di su carera periodistico. Tambe a wordo presenta cu e sospechoso desde e prome sentencia no a drenta den contacto mas cu polis ni husticia. Ademas el a tene combersacion cu Minister di Husticia y e Korpschef tocante un posibel radio propio pa prensa pa notificacion y e tin bon contacto cu Korps Politie Aruba. Ora cu nan pidi’e pa no publica cierto asuntonan, e ta cumpli cu ne. Pues un relacion diferente.
Maske Hof a duna di conoce cu pa hechonan manera esakinan un castigo di prizon incondicional en principio ta apropia y necesario, el a mira den e cambio di postura y e circunstancianan personal motibo pa desvia di e decision di prome instancia.
Hof a anula e castigo imponi den e sentencia di 18 di december 2024 y a dicidi lo siguiente:
Castigo di prizon: 18 luna di prizon completamente condicional, cu un tempo di prueba di 3 aña.
newCastigo di trabao: Un castigo di trabao incondicional di 240 ora, cu si no wordo ehecuta debidamente lo wordo cambia pa 120 dia di detencion.