Diasabra, 29 di Juni ultimo Camara di Comercio a tene su evento anual Business Plaza – Get Started, cu tur aña ta lanta interes cerca tur esnan cu kier cuminsa cu su negoshi. Riba e dia aki e participantenan a haya hopi informacion al caso riba con pa cuminsa un negoshi of ta den e proceso pa formalisa uno.
Via e evento Get Started! KvK ta yuda haci idea un realidad y brinda e guia necesario pa por cuminsa y maneha bo propio negoshi. Durante e dia aki KvK a brinda e chens pa e participantenan cu tabata desea esaki pa registra nan negoshi di biaha y di e forma aki cana e caminda pa organisa bo negoshi.
Durante e evento, tabata tin varios presentacion y tambe un workshop, cual tabata un sesion practico encuanto con pa uza e pataforma digital nobo di KvK: Mijn KvK, duna pa Tatiana Britten-Dubero y Bachera Erasmus-Mari
Den e sesion aki a duna un splicacion con pa uza e plataforma digital nobo di KvK: Mijn KvK. Esaki tabata na encargo di Tatiana Britten-Dubero y Bachera Erasmus-Marin.
Fuera di esey, durante henter e evento, tabata tin presentacion di varios orador, entre otro di Gina Habibe, director ehecutivo di Aruba Bank, kende a comenta cu e ta hopi contento di a wak un turnout asina grandi mas cu biaha pasa. A keda demostra cu tin hopi interes pa informacion encuanto lantamento di negoshi chikito.
Tambe e ta conta cu e ta sinti e registracion cu KvK a presenta di e negoshinan a cuminsa baha un tiki. P’esey Habibe ta mira cu hopi hende tin miedo di acerca banco pa financiamento y tambe pa habri cuenta. Berdad awendia mester di hopi rekisito pa habri un cuenta di banco y mester ta bon prepara.
Habibe a comenta cu tabatin hopi bon punto cu a trece dilanti. A splica e participantenan pa planea kico ta e idea cu e negoshi, pakico kier drenta den negoshi, visualisa unda kier yega p’asina por stipula tambe con kier yega na dje, pa asina bo tin un bon business plan y sigui’e. No traha e business plan pa banco, sino pabo mes.
Jean Carlos Espinal di AWG Tours & Services a conta di su experiencia como un emprededor.
El a splica un tiki di su mesun trayectorio como empresario. El a cuminsa hopi hoben den e mundo di negoshi. El a splica esnan presente e realidad di tin un negoshi. “Hopi biaha nos ta pensa di tin un negoshi cu tur cos ta bunita, pero tin bentaha y desbentaha den dje.”
El a splica tambe un tiki di su bida, mirando cu e no ta un persona cu a termina universidad. E kier a motiva e hobennan pa nan compronde cu ta importante pa finalisa bo scol, pero si pa circumstancianan di bida un hoben no logra termina su sco, toch bo por ta exitoso den bida. “Bo mester tin e gana pa bay dilanti.” Den su caso, e no a caba universidad. El a caba EPB Hato, cual tabata un tremendo educacion y for di eynan el a pusha y sigui dilanti. E miho les di bida ta bida. Kico ta e realidad, kico ta come y bebe. El a splica en general tambe, con por traha cu un ekipo di persona, con bo ta presenta cu proyectonan y con bo por keda expande y haci un negoshi exitoso.
Sander Bermudez ta un studiante di Colegio EPI y a participa den e Business Plaza, pasobra e tabata kier mas informacion riba con pa e cuminsa cu algo su mes. E ta conta cu e Business Plaza tabata hopi interesante, pasobra esnan cu a atende a haya hopi informacion cu ta balioso y cu por uza bek den e paso ora cu bo mes tin pensa pa habri bo propio negoshi.
El a ripara cu nan tabata papia hopi di business plan y ta net loke nan ta bay haci tambe pa e ultimo aña escolar aki. Bermudez ta haya cu e informacionnan tabata di suma importancia pa su mes, pasobra awo e sa ki pasonan e tin cu tuma prome cu habri un negoshi.
Tambe el a comenta cu si tur cos bay bon, e tin pensa pa dal e paso aki den mundo di comercio. E tin su soño- y metanan, y ta pensando pa bini cu algo cu ta unico, cu e por bend’e y haci esaki,manera cu a splica tambe durante di e evento cu si esaki di berdad ta algo nobo riba mercado, cu e ta bon bendi. No pa e prome dos of tres lunanan, sino den un temporada hopi largo.
Durante di e evento tabata tin oportunidad pa haya varios consulta entre otro cu director di Camara di Comercio, conseheronan y tambe Departamento di Asunto Economico tabata disponibel pa duna informacion riba permisonan.
Un representante di Universidad di Aruba tambe tabata t’ey cu informacion riba programanan educativo pa empresarionan.
Den otro palabra un dia exitoso pa empresario y comerciantenan cu a asisti na e evento aki, caminda cu nan por a haci networking y sa un tiki mas, haciendo e dia aki uno exitoso.
