E prome reaccion di e cambio di ley di Daphne Lejuez di MEP pa loke ta BBO den recibo of
no, segun parlamentario Richard Arends di AVP, ta positivo.
Nan ta haya cu BBO mester keda visibel pa fomenta transparencia di loke e consumidor ta
paga. Ta puntonan cu a trece dilanti durante tratamento di ley. A indica esaki y henter
fraccion di AVP tabata hopi cla, bisando cu na momento cu inclui e BBO den e prijs, ta bay
bira un free for all, unda cu no tin control. Door di haci algo pa kita e discusion cu tabatin
entre e consumidor y comerciante, no ta e forma adecuado.
“Obviamente ora a trece esaki dilanti, Gobierno a bisa cu lo duna un tempo di gracia, pa
complica e asunto un poco mas. Na momento cu a cuminsa pusha cu fecha, sea ta cumpli
cun'e of retracta e ley aki, Gobierno no a duna oido na e reclamonan. Si AVP a bini cu un a un amienda, e no lo a wordo sosteni,” Richard Arends a splica. Mescos cu gremionan ta scucha AVP, tambe a yega na e fraccionnan cu ta sostene Gobierno y na momento cu Gobierno no ta duna oido, Parlamento mes ta tuma accion. Ta spera cu e por conta tambe cu sosten di e otro fraccionnan. Fraccion di AVP ta mira un amienda asina algo positivo, pasobra ta duna oido na e preocupacionnan cu tin den comercio y tambe transparencia.
E problema di mas grandi no ta solamente e aumento di impuesto cu e pueblo mester carga,
pero e incertidumbre cu e ta trece cun’e, e falta di decision. “Na momento cu ta bin cu un
ley, ta duna un tempo di gracia. E tempo di gracia aki di linksbuiten, ta wordo extendi un
biaha mas y obviamente awo Parlamento ta haciendo uzo di su derecho, ta bin pa elimina e
prohibicion ey.” Arends ta kere cu e ta crea incerdicumbre y ta spera cu Gobierno tambe
capta e señal aki. Mester tuma un decision na momento cu ta trata economia. Bo no por
laga comerciante den incertidumbre, no por laga consumidornan den incertidumbre
tampoco. Ningun hende no sa si sugartax ta bin si of no.
Obviamente ATIA tambe a vocifera su preocupacionnan. E prome fase di Reforma Fiscal tabata solamente un aumento di impuesto. Un aumento di impuesto pa consumidornan, perdida di poder di compra pa consumidornan, aumento di impuesto pa comerciantenan. Si bo ta bay bin cu un di dos fase, want’e te ora cu situacion normalisa atrobe y tuma un decision cla, pa tur hende sa na kico atene nan mes. Cumplimento Segun parlamentario Arends, tin acuerdonan cu tin cu cumpli cun'e. Sea ta cu comercio, cu consumidor of CFT. Por ripara cu den contienda electoral hopi cos a wordo priminti, pero ora cu ta den Gobierno no por cumpli cu nada, of ta haci meramente lo contrario. Esaki ta algo cu AVP a condena y critica tambe publicamente. Tratamento di Ley Durante tratamento di Ley na december, MEP a vota na fabor di Reforma Fiscal y AVP tabata contra. Awe un parlamentario di MEP ta pidi pa draai bek un decision cu el a vota voor. Segun Arends, e kehonan cu nan a ricibi na december, ta loke cu a motiva AVP pa vota contra.
“Nos no tin nada contra Reforma Fiscal. Loke cu ta contra ta djis hisa un peso di impuesto riba lomba di pueblo. E incertidumbre cu no tin acuerdonan cla, ki momento algo drenta na vigor, esey ta causa espacio pa speculacion y obviamente ta causa espacio pa aumenta prijs. E bosnan ey a yega cerca AVP na december di aña pasa y awo a yega na e parlamentarionan cu ta sostene coalicion. Nan a actua manera cu nan no a scucha pueblo.
Semper AVP ta scucha comerciante. “For di momento cu e ley a wordo presenta a manda
un carta na tur gremio y sindicato pidiendo nan contribucion y a haci tambe un yamada na
presidente Parlamento e tempo ey pa por fabor scucha gremio, pa haci e preparacionnan
bon pa e ley aki. Pero desafortunadamente ora ta den oposicion, no ta tur ora tin oido pa
loke ta trece dilanti y e ley a wordo gebulldozed den dos dia, prome cu Pasco.” Amienda di oposicion Fraccion di AVP ta sostene un ley asina, caminda cu e BBO ta keda aparece riba e factura. Pero ta algo cu a bin ta wak tambe durante ultimo dos añanan. Parlamento semper tin derecho di amienda. Pero cambia algo te den su escencia of verwerk algo, keda sin vota pa algo, ta señalnan cu den nos sistema constitucional Gobierno mester bay cas.
Na momento cu Minister ta presenta un cuenta anual di 2016, caminda cu ta djis pa comproba e saldo di e aña ey, coalicion den su totalidad, ta traha e ley aki y e no ta haya aprobacion, ta motibo pa Gobierno bay cas. Sinembargo esey no a sosode, e ta bisa. Ley di Supervision Financiero ta mesun cos. “No ta djis un cambio pa algo specifico, pero un cambio den escencia di loke Gobierno presenta, pero den e escencia tambe di e acuerdonan cu
Gobierno a cera. Gobierno mester a tuma su conclusionnan e dia anochi ey y entrega su
retiro. Esey no a sosode atrobe. Por a mira den e caso di BBO, algo cu a wordo aproba den
Parlamento, awor aki, despues di seis luna, ta wordo cambia atrobe. Esaki ta algo cu ta bira
tipificante pa e Gobierno, cu nan ta haya cada biaha mocionnan di desconfiansa y ta keda
sinta toch.
