Recientemente Corte di apelacion (Hof) a dicta sentencia den un caso di boet cu autoridad local a impone contra operador di casino, WRS International N.V. y doño di e licensia Aruba Hotel Enterprises N.V. (AHE). E caso ta pa motibo cu no a cumpli den raporta cinco diferente transaccion di mas di cinco mil florin cu a tuma luga den e casino. Hof a confirma e sentencia di Corte di Prome Instancia y como tal e hotel ta reaponsabel pa un multa di Afl. 600.250,- cu awor nan lo pasa pa cuenta di WRS International N.V.
E boetnan tabata relaciona cu diferente violacion di e ley di Landsverordening voorkoming en bestrijding witwassen en terrorismefinanciering (Lwtf) den un casino. E pregunta den e caso cu Corte a haya pa trata ta si ta esun cu tin e permiso di casino of si ta esun cu ta opera e casino ta esun cu a viola e ley. Hof a conclui cu no tin motibo pa bisa cu esun cu tin e permiso no ta responsabel pa violacion di e ley.
Aruba Hotel Enterprises N.V. (AHE), cu tin e permiso, a apela e decision di Corte di Prome Instancia, cu ta data di 24 di augustus, 2022.
Kico ta e caso
Banco Central di Aruba (CBA, pa su abreviacion di e nomber na Hulandes), dia 3 di juni 2020, a impone riba AHE un boet di Afl. 722.500,-. Despues di evalua obhecion di AHE, CBA a baha e boet aki pa uno di Afl. 605.250,-. E caso a bay Corte y na augustus 2022, a pone un boet di Afl. 600.250,-. Pero contra esaki tambe AHE a dicidi di apela.
E historia
AHE ta opera Riu Palace Antillas, situa na Palm Beach. Den e hotel tin Orchid Casino. Pa esaki e operador tin un permiso di casino cu ta data di 1 di augustus 1977, pero esun cu ta opera e casino ta WRS International N.V. Nan ta huur for di AHE un espacio den e hotel y ta haci uzo di e permiso di casino cu AHE tin.
Investigacion di Banco Central
Banco Central ta e instituto local encarga pa control transaccionnan financiero y evita labamento di placa. Na november 2017 a haci un investigacion na Orchid Casino pa cumplimento di reglanan di Landsverordening voorkoming en bestrijding witwassen en terrorismefinanciering (Lwtf), manera haci investigacion riba cliente y melding di transaccionnan inusual.
Multa pa violacion
A constata cu den e periodo di 1 di januari 2016 te cu 31 di october 2017, AHE a comete varios violacion di reglanan di e Lwtf. Den cuadro di esaki a informa AHE na januari 2020 cu nan tin intencion pa impone un boet di Afl. 722.500,- Riba esaki nan a reacciona dia 19 di februari 2020.
E fayonan
Den caso di dos cliente no tabatin copia di nan identificacion den nan dossier; no tin un control continuo; den 13 transaccion no a haci un debido investigacion riba cliente cu no ta biba na Aruba. Y tabatin 18 transaccion inusual cu no a informa Meldpunt Ongebruikelijke Transacties (MOT).
Corte: Hotel ta responsabel pa e casino
Corte a bisa cu ta AHE ta esun cu tin e permiso y mester percura pa cumplimento cu Lwtf. E echo cu WRS ta esun cu ta uza su permiso, no ta kita nada na su responsabilidad. E violacionnan cometi ta serio y e boet y ta na su luga. Pa loke ta e suma a tene cuenta cu e echo cu AHE no tin un record y a coopera cu e investigacion.
A baha e multa
CBA despues a baha e boet cu 100 mil florin y tambe a duna nan un reduccion di 10% relaciona cu pandemia di COVID-19. A mustra AHE tambe cu ley ta bisa cu esun cu ta doño di e permiso ta esun cu mester percura pa cumplimento di tur ley. Y nan tabata na altura si mira cu riba 19 di october 2015, a pidi Financial Intelligence Unit of Aruba (FIU) un formulario pa meldo un transaccion inusual den Orchid Casino.
E operadornan ta riscante
A menciona tambe cu desde 2014 caba AHE tabata consciente di e risico cu den Orchid Casino no ta cumpli cu e Lwtf. Entre otro pasobra e manager di e casino ta un persona condena pa echonan castigabel. Te november 2015 AHE a duna WRS dies dia pa finalisa e relacion di trabou sino lo cancela e acuerdo di huur. El a bolbe manda un carta dia 3 di october 2016. No ta conoci si WRS a cumpli cu e ordo.
AHE a pone pia’bo: Cumpli of boso ta afo!
Tambe tin informacion cu AHE a laga haci un audit, cu a tarda basta pasobra Orchid Casino no kier a entrega tur documento necesario. Atrobe AHE mester a menasa nan pa haya informacion necesario. Despues AHE a informa CBA di e actitud di WRS. E momento ey CBA a bisa AHE cu mester a informa nan di presencia di e manager cu record den e casino. A nota si cu AHE a laga investiga maneho den e caso via un rapport di Deloitte fecha 10 di februari 2017.
Hof: Les pa AHE ta mas estricto!
Hof a conclui cu CBA a mira den e falta di accion di AHE pa tuma paso, como motibo pa impone un boet. Ademas di un reduccion di 100 mil florin, a duna un reduccion di 10% debi na Pandemia. No a duna mas pasobra na diferente ocasion a pidi AHE e relatonan anual, pero no a haya esaki.
