Biblioteca Nacional hunto cu Kerekentenchi dia 11 di augustus proximo, lo tin un Back 2 School Festival 2023.
Glenda Zavala-Maduro, Guia di Actividad di Biblioteca Nacional, a cuminsa na bisa cu nan tin un programa bunita hinca den otro pa e muchanan. E lo cuminsa 6:00pm te cu 8:00pm. Lo tin show di baile, di canto, show di magia, contamento di storia di diferente escritornan di Aruba. Gucci Danceres tambe lo t’ey presente pa duna nan presentacion.
Esaki no ta e prome biaha cu Biblioteca Nacional ta organisa e evento aki. Aña pasa e organisacion tabata na encargo di Biblioteca Nacional San Nicolas hunto cu Kerekentenchi. Y e aña aki e evento a bin pabou na Biblioteca Nacional Oranjestad. E aña aki ta su di dos aña cu Biblioteca Nacional ta organisa e evento aki.
E evento mes ta gratis, pero si nan tin nan stand di popcorn, cotton candy refresco cu nan lo bende na un prijs sumamente abou. Asina e muchanan por tin algo pa come y bebe.
Nan tin hopi meta pa cu e evento aki. E muchanan a caba di pasa den tanto cos y Biblioteca kier duna e muchanan algo como recompensa, kisas nan a bay over. Y esunnan cuno a bay over, nan ta haya mas estimulo, pa nan haci nan best pa nan bay over e otro aña.
Biblioteca Nacional ta spera tur mucha dia 11 di augustus, pa 6:00pm, pa asina hunto cu otro mucha, bin disfruta di un rato agradabel hunto cu otro mucha, disfruta di poppenkast, di Kerekentenchi, di baile, musica, gruponan di baile y e lo termina pa 8:00pm.
Por ultimo, Zavala a gradici Kerekentenchi cu semper ta coopera cu Biblioteca Nacional, cu ta haci tur lo posibel pa sigui organisa actividadnan pa mucha. Un invitacion special na tur mucha pa bin Biblioteca Nacional n’e parti patras pa asina disfruta di un rato agradabel.
