Papia malo di hende no ta un hobby,
E ta un mal custumber,
Ofende hende sin tin mester,
Kibra hende pa motibo di envidia,
Pone hende na suela djis pasobra nan a triunfa,
Uza hende su pasado of su foutnan p’asina purba rebah’e den bista di hende,
Ripiti cada rato cu e persona lo no logra, no ta bin di Dios.
Tur esey ta sali for di un curason yena cu orguyo, arogancia y malicia, pasobra pa bo haci un hende malo bo mes mester ta malo, pasobra tur locual ta maldad ta sali for di curason di hende.
No ta cumbini ningun hende bira hacido di mal respondi pa otro hende, si un hende mester bisa bo pa perhudica un otro persona, bise den su cara bo mes bay hacie. No tuma su amargura riba bo.
Boluntad di Dios ta pa nos stima nos prohimo manera nos mes y Dios ta prohibi nos di bay den nos mes pasado of den pasado di otro bisando: “No recorda e cosnan di antes, ni keda pensa riba cos cu a pasa caba. Mira, mi ta bay haci algo nobo. Awo esaki ta bay sali na cla, boso no ta ripara esey?
Lo Mi traha un caretera den tera seco riu den desierto.” (Isaias 43:18-19)
Palabra agradabel ta manera panal di miel, dushi pa alma y curamento pa weso (Proverbionan 16:24),
Kita for di bo un boca engañoso y tene e lipnan perverso leu for di bo. (Proverbionan 4:24)
Ta ken ta e hende cu ta desea y ta stima bida largo, p’e por mira bondad. Warda bo lenga di maldad y bo lipnan di papia engaño. (Salmo 34:12-13)
No paga malo cu malo of insulto cu insulto, ma mas bien dunando un bendicion, pasobra a yama boso p’e proposito aki pa boso por hereda un bendicion. (1 Pedro 3:9-10).
Dios ta yama nos pa proclama Su palabra, pasobra proclamando palabra di Dios nos ta trece sanacion, liberacion, reconciliacion den bida di hende. Nos ta bisando e mundo con grandi Dios ta, con poderoso nos Dios ta, con Bondadoso Dios ta y su Misericordia ta pa semper.
E grandesa di nos Dios ta incomparabel, Dios nunca ta yega laat, semper ta na tempo y Dios no ta lubida riba nos peticionnan, semper e ta contesta.
P’esey nos mester predica e palabra y sea prepara na tempo y for di tempo, spierta, reprende y exhorta cu hopi pasenshi y instrucccion. (1 Timoteo 4:2-5).
Ta bon pa nos siña nos yiunan pa papia bon di otro, papia bon di nan famia, papia bon di tur hende cu nan conoce y evita di papia malo di hende cu nan no conoce. Siña nan con pa warda nan curason for di rabia y falta di perdon.
Ora nos haci esey nos mes ta psicologo di nos yiu, pasobra sin nos sa nos ta dunando terapia di positivismo, cual nos ta haci nos yiunan integro y cu bon caracter.
Mas limpi y puro curason di un hoben por ta mas mihor su caracter lo ta y tambe su comunicacion cu Dios,
Awo t’e tempo pa nos uni papia y positivo y duna otro bon conseho, pasobra positivismo ta trece crecemento den tur area di nos bida, desea otro bon y bondad lo abunda pa bo, menos bo critica y menos bo murmura, mas lihe lo bo pasa den bo prueba, pasobra Dios ta wak bo curason.
Laga nos uza e autoridad cu Dios a duna nos y sigui papia positivo y proclama e bondad di Dios tur caminda.
Sinceramente, Pastoor Marcel Balootje
