Polisnan cu esnan di Parke Arikok diamars mainta a bay na Boca Turtuga. Esaki ta un area den Parke Arikok tegen over di grot di Guadirikiri. Eynan un mitar curpa a yega tera.
E boca yama Boca Turtuga. Por a confirma cu ta mitar curpa di un homber. E parti di su pianan a disparce. E mitar curpa tabata benta riba beach. No mester a drenta lama pa sac’e. Ayera caba autoridad a mira cu tin un di cuater curpa pero a bira scur.
A dicidi cu ta sigui mainta cu e buskeda. E unidad di polis di San Nicolas a yega prome na e sitio y asina activa e demas departamentonan cu tambe a presenta. No sa si ainda tin mas hende perdi. E boto a bolter y tin hende cu a yega tera y dos di nan a bati na porta di e prome bisiña cu nan a topa.
Eynan a avisa cu boto a bolter y tin hende cu a hoga. For di e momento ey caba a topa e prome dos curpanan cu tabata dos hende muhe. Autoridad ya a logra e prome contactonan cu famianan pa asina cuminsa reconoce e prome dos damanan cu a haya sin bida benta riba baranca. Investigacion ta continua pa mira si por yega na e capitan pa e tambe splica kico a pasa. Esey ta si e mes ta na bida.
