Pa e actividadnan di fin di aña aki pa asina trece un bida bek den Caya Betico Croes y haci e experiencia di compra mas placentero, Gobierno di Aruba a dicidi pa bin cu un comision cu ta consisti di representantenan di diferente ministerionan. Prome Minister Evelyn Wever-Croes a apunto Sra. Lindy Croes pa encabesa e comision aki. Sra. Croes ta hopi conoci pa riba su mes organisa diferente actividad den e Caya pa haci e experiencia di compras mas placentero.
Den e conferencia di Prensa di Gobierno dialuna mainta, Sra. Lindy Croes a elabora riba e evento cu lo bay tin e fin di siman aki. Pa diabierna 22 y diasabra 23 di december lo bay tin “Shopping Night”. Diadomingo 24, Caya Betico Croes lo ta habri tambe. Dia 29 y 30 di december tambe lo tin eventonan pa asina cera e aña cu celebracion cu un sintimento Arubano.
Sra. Croes a bisa cu e actividadnan aki ta enfoca pa famianan bin hunto y disfruta di Caya Betico Croes haciendo nan ultimo compranan prome cu Pasco. Durante orarionan aki, lo bay tin varios atraccionnan pa muchanan como tambe pa hende grandi pa tur por experiencia e cambio di fin di aña haciendo compra den un ambiente alegre.
Den e siguiente dianan nos dilanti, Sra. Lindy Croes lo duna mas informacion di kico tur tin prepara pa e fin di aña aki den Caya Betico Croes y for di awor caba e ta desea tur famia cu bishita Caya Betico Croes durante e actividadnan aki pa nan disfruta grandemente hunto.
