Na 2012 a cuminsa cu un proyecto di POH, e Praktijk Ondersteuner Huisartsen, cu a cuminsa como un pilot project. Den transcurso di e añanan a ripara of AZV a ripara cu esaki a trece su frutonan dilanti. Nan a cuminsa prome cu 4 POH, cu tabata traha na 4 dokter di cas. Poco poco a ripara cu e pashentnan mes y e cuido di diabetes, pasobra esey ta locual cu ta wordo traha riba dje, esta e prevencion y e informacion na e pashentnan cu ta diabetico, nan ta cuminsa ripara cu e waardenan di e sucu a cuminsa baha cerca e pashentnan aki. E pashentnan a cuminsa baha peso. Esey tambe ta algo cu a bay hopi bon y ora cu nan a ripara cu e cambionan aki positivo a bira mas y mas, a yega momento cu nan a dicidi di bin cu e opleiding mes pa e POHnan, cu a pasa hunto den conexion cu Breede Rode Instituut. Asina ey a cuminsa cu 13 POH cu a haci e opleiding completo. E aña aki ta bisa cu a recluta 8 POH mas. Eynan ta mira cu poco poco e trend a cuminsa subi y e dokternan di cas mes awor aki ta hopi contento cu e trabao di e POH y e pashentnan dimes, ta hopi satisfecho cu e trabao. Bo ta wak cu e dokternan di cas tambe a cuminsa pidi mas pa nan tin un POH. Di manera cu a recluta 8 POH y na April 1, 2018, tin 8 POH mas acerca, cual ta haci un total e ora 21 POH, segun Jasmira Croes-Mora kende ta coordinador di praktijkondersteuner huisartsen na Wit Gele Kruis.
Cu esey a cover mayoria di e dokternan di cas. Tin 42 dokter di cas actualmente. 5 so no lo haya un POH, pero esey ta bin tambe door cu mester tin un espacio adecua pa e por sinta y asina haci su consulta. E tin hopi di haber cu e privacidad cu e pashent. No por bay sinta unda cu ta zomaar. Pa aña 2019, tur e dokternan di cas, sigur sigur lo tin un POH.
