E comision cu a wordo institui recientemente pa Gobierno di Aruba cu e meta pa trece actividad y bida bek den Caya Betico Croes, a cuminsa cu e planificacionnan pa asina e pueblo por tin un experiencia diferente e ultimo dianan di aña nos dilanti. E proyecto aki ta wordo desaroya den colaboracion cu ATA.
Ademas, Gobierno di Aruba ta trahando cu hopi hende hoben talentoso y yiu di tera. Hobennan prometedor mustrando asina cu Gobierno ta trece cambio no solamente door di papia so sino pa duna e hobennan aki un chens pa actua y desaroya nan ideanan na beneficio di nos comunidad.
E comision aki ta consisti di diferente representantenan di varios ministerionan entre otro Ministererio di Asuntonan Economico, Ministerio di Infrastructura, Ministerio di Transporte, Ministerio di Husticia, Ministerio di Turismo cualnan tur ta cay bou di Ministerio di Asuntonan General.
Prome Minister sra. Evelyn Wever-Croes a enfatisa cu e decision aki lo no trece solucion pa e problema di Caya Betico Croes di inmediato. E comision aki a wordo instala den e corto tempo cu Gabinete Wever-Croes tin sinta pa asina trece actividad y bida awor aki durante e ultimo dianan di aña 2017 pa di e forma aki e comunidad completo di Aruba por cuminsa sinti e cambio di e gobierno aki.
Prome Minister a enfatisa tambe cu pa otro aña manera e aña bolter, e comision lo wordo amplia cu diferente departamento di gobierno pa trece cambionan necesario den e maneho di Caya Betico Croes. Varios ta e temanan cu lo bay trata den e reunionnan proyecta pa otro aña entre otro si lo habri caya bek pa trafico, kico lo pasa cu parkeermeters y otro temanan cu lo bay den consulta cu e diferente comerciantenan.
Pa coordina e proyecto aki, Minister President a apunta sra. Lindy Croes kende ta conoci pa trece actividadnan den Caya Betico Croes y ta goza di e confiansa di comunidad. Sra.Croes a organisa riba su mes diferente actividad cu a bira hopi exitoso den centro di ciudad. Pa e motibo aki Prome Minister no tabatin ningun duda y a acerca Lindy Croes pa ta na cabes di e proyecto aki sperando asina cu e fin di aña aki lo bay tin actividadnan cu lo haci e oranan di compras mas placentero y atractivo pa e pueblo di Aruba.
