Mundu mas i mas ta konsiente di un aserkamentu “green” i gobièrnunan di paisnan ta traha inkansabelmente pa yega na manehonan kaminda ta tene debidamente kuenta ku medio ambiente.
Kolektamentu di sushi separá ta hopi na moda i un pais responsabel ta bai den e direkshon ei. Algun aña pasá ku plaser nos a tuma nota ku a bini bakinan di separashon di bòternan di plèstik na Parlamento di Kòrsou.
Komo e órgano mas haltu den e pais aki i komo representante di pueblo ta importante pa nos aportá na un medio ambiente i pais mas duradero i ku ta tene debidamente kuenta ku medio ambiente.
P’esei nos a keda altamente sorprendé ku a kita e bakinan di separashon di plèstik aki i bai bèk na bentamentu di plèstik den baki di sushi i sigui susha nos medio ambiente.
Ta nos komo representante di pueblo i e órgano mas importante den e pais aki mester duna e bon ehèmpel.
Mi ta spera ku, kual sea a motivá e desishon pa kita e bakinan di separashon di plèstik, ta rekonsiderá e desishon i rápidamente pone e bakinan bèk.
