For di 1983, cu un total di 47 corona, 35 di nan riba su nomber, considera manera The King Of Calypso, Mighty Talent a organisa un tremendo evento unda a hiba tur hende bek den tempo na Centro di Bario Brazil.
Esaki tabata un tremendo ambiente unda tur legendario a bin topa otro. Entre otro, Chicho Kock, Long Roy, Mighty Cliffy, Tattoo Quant y Leo Martis. E ambiente tabata hopi bon, e luga tabata yen yen cu ni cana hende por a cana. Tur legendario di fiestanan bieu a bini hunto den un bon ambiente. Chicho Kock tabata tin su legendarionan hunto cu ne y tur e temanan clasico a keda presenta. “Awe ta all out nos ta bay,” segun Chicho Kock.
Otro cara conoci, Long Roy, ta conta nos cu e anochi a bay sublime. “Mi tin hopi tempo sin wak un ambiente asina ey, mi’n por cont’e, hopi tempo mes,” Long Roy ta expresa. Long Roy a los su piesa Hisa Man Na Laira y hopi tema duro. Might Cliffy tambe tabata presente, despues di basta aña sin subi stage. “Mi ta sinti hopi great. E ultimo tabata e evento di Setar cu a bay sublime, awor mi ta sinti nervioso pero mi t’ey,” Mighty Cliffy ta bisa.
Tattoo Quant tambe a haci su presencia den e evento aki anto toca e cancion mas pidi, esun cu ta e stempel di cantica di tur tempo cual ta Back and Front. “Tremendo, mi no a spera cu e tabata asina yen, manera mi a yega mi a bisa waw,” Tattoo ta bisa.
Otro legendario, Leo Martis, tambe presente, tabata hopi contento di mira asina hopi hende presente cu a bin disfruta di e musica y ambiente di carnaval. “Mi ta kere e pueblo gusta e legendarionan, e musica di antes, y awenochi bo ta wak e.” Leo Martis ta reconoce cu tin un otro generacion di hoben musico awor y p’e nan ta okay, “pero toch bo ta wak cu falta algo, pero falta algo, nan ta haciendo nan best, sigur sigur,” Leo Martis ta comenta.
