Princess Juliana International Airport (PJIAE) na Sint Maarten ta conta atrobe cu un departure hall completamente renoba y nobo. De facto, e proyecto mester a keda cla durante e di tres trimester di aña 2022, pero a pospone te cu februari di aña 2023. Henter e reconstruccion di aeropuerto a pasa door di retraso y mal maneho. E pasaheronan mester a warda shete aña despues di horcan Irma, pero finalmente e terminal ta kedando cla. E area nobo di check-in tambe lo keda cla fin di e luna aki, segun Brian Mingo, CEO di e aeropuerto.
Mas ocupa
Princess Juliana International Airport (PJIAE) ta e di dos aeropuerto mas ocupa den Noordoost di Caribe y ta fungi como un centro di conexion importante pa Saba, Sint Eustatius, St. Barthélemy, Anguilla, Dominica, Nevis y Tortola. E aeropuerto ta un di e companianan cu ta brinda mas empleo riba e isla, cu un total di 305 trahado den servicio directo y un total di 1.700 trahado rond di henter e comunidad di aeropuerto. Na aña 2023, aeropuerto di Sint Maarten a atende alrededor di 1.5 miyon pasahero y un cantidad di 54.000 movecion di avion. E trabounan di reconstruccion di e aeropuerto a cuminsa den luna di september di aña 2021.
Apertura
Apertura di e departure hall ta un paso importante pa ta un aeropuerto completo. E biaheronan lo tin acceso na un variedad limita di opcion di compra y restaurant y ta priminti cu lo tin mas den e siguiente lunanan. E departure hall nobo, cu ta consisti di mas di 10.000 meter cuadra, ta ekipa cu tecnologia di ultimo generacion, caminda control di pasahero y proceso di inmigracion ta haci uzo di avancenan tecnologico. E area nobo di check-in lo keda cla den e ultimo dianan di januari. E espacio aki ta diseña pa brinda e pasaheronan un experiencia di check-in mas madura. E puntonan hybrid pa entrega maleta ta ekipa cu counter caminda e personal di e aerolinea lo por atende e pasaheronan na momento cu ta necesario. Esaki ta duna e aeropuerto mas flexibilidad p’asina complace e demanda den futuro.
Yegada
Asina cu termina cu e area di salida y check-in, lo concentra riba e di dos fase; construccion di un sala nobo di yegada. E terminal nobo aki lo brinda e pasaheronan un sensacion di bonbini, cu sistema di maneha ekipahe mehora, proceso eficiente di inmigracion y aduana como tambe mehoracion di instalacion pa e pasaheronan. E meta di e fase aki ta pa mehora e fluho di pasahero y garantisa un transicion perfecto for di avion te na e salida. Ta spera cu e construccion di e arrival hall ta cla durante e di dos trimester di aña 2024, net na tempo pa e temporada di zomer.
Financiamento
Banco Mundial y Gobierno di Sint Maarten a inverti 72 miyon di dollar den e “Sint Maarten Airport Terminal Reconstruction Project”. E proyecto ta un iniciativa tripartite: 72 miyon di dollar ta bin for di “Sint Maarten Recovery and Reconstruction Trust Fund”, financia pa Gobierno di Hulanda y administra pa Banco Mundial, 50 miyon di dollar ta un prestamo di “European Investment Bank” y 7 miyon di dollar ta bin di parti di aeropuerto mes.
Tocante Princess Juliana International Airport (PJIAE)
A cuminsa uza e pista di aterisahe na aña 1942 pa avionnan Mericano durante e di dos guera mundial. Su siguiente aña, na 1943, a baha e prome vuelo comercial riba dia 3 di december 1943. E futuro Reina di Hulanda, esta Prinses heredera Juliana a bishita e isla, uzando e aeropuerto aki na aña 1944. Eventualmente, a opta pa yama e aeropuerto na su nomber. A remodela e facilidad na aña 1964 y a mud’e. A bolbe renoba e edificio na aña 19985 y na 2001.
Dia 6 di september 2017, horcan Irma, di categoria 5, a pasa riba St. Maarten y a laga e aeropuerto na werki. Cuater dia despues a habri e aeropuerto bek pa uzando facilidadnan temporal y pa cuminsa cu trabou di renobacion. Wel, manera por mira, e trabounan aki a dura exactamente shete aña pa awor porfin ta cabando, despues di varios escandalo interno, corupcion, cu a causa cabes di varios director den e proceso. E fondonan a bini di Gobierno di Hulanda, pero ta controla door di World Bank cu ultimamente a scoge Schiphol Group pa supervisa e trabounan di renobacion y operacion.
Henter e area di aeropuerto ta midi 642.415 m2 mientras cu e terminal mes ta midi 30.500 m2. E tin capacidad pa maneha entre 36 pa 40 movecion pa ora. Nan tin 13 gates pa aborda, tin 46 balie pa check-in, 10 jet bridge, tin 50 balie di Inmigracion (yegada) y 5 balie di Emigracion (salida). Aeropuerto di Sint Maarten, den un solo palabra…ta e motor economico cu ta sirbi e wes’i lomba di crecemento y desaroyo economico, reponsabel pa no menos di 60% di e GDP di e isla.
