Manera cu nos a informa caba, awe mainta 9:00 am a tuma luga tratamento di e peticion di fiscal di Ministerio Publico, pa prolonga e detencion di e sospechoso Benny Sevinger cu un maximo di 60 dia mas. Esaki despues cu e parlamentario a cumpli awe 26 dia caba encarcela, den e investigacion “Avestruz”. E tin 16 dia caba cera na KIA y su abogado a pidi hues-comisario awe pa suspende e detencion. A menciona varios motibo pa esaki pero un di nan sin duda ta eleccion parlamentario cu ta tuma luga otro siman. Su encarcelacion lo tin influencia directo riba su futuro politico pa e siguiente cuater añanan y asina tambe lo influencia e resultado di eleccion 2021.
Hues-comisario mr. Jane Jansen a atende e procedura penal awe pa corte via sistema di zoom. Fiscal di un banda, abogado na e otro banda y e sospechoso via camara na KIA mes. A scucha e argumentonan di fiscal pa prolonga e detencion. Hues-comisario Jansen a dicidi mesora pa bay di acuerdo cu e peticion di husticia pa prolonga e detencion cu 60 dia mas. Pero, a keda di pensa un rato riba e peticion di defensa di Sevinger pa suspende e detencion. E Magistrado a informa e sospechoso y su abogado cu mas den dia awe e lo informa di su decision pa laga Sevinger liber.
E asunto aki ta un cuchiu cu ta corda ambos banda. Di un banda tin Ministerio Publico cu a tarda demasiado cu e caso aki pa lag’e bin desaroya den port’i eleccion. Y pio ainda cu nan mes a manda carta pa e sospechoso sigur’e cu lo no atende cu e caso prome cu eleccion, pa despues nan cambia di opinion of strategia y toch purba haci e caso den eleccion mes. Pa e sospechoso, esaki ta mustra un tipo di persecucion politico of pa Ministerio Publico (lesa Hulanda) purba influencia resultado di eleccion na Aruba.
Pero di otro banda, e partido mes tambe tabata consciente cu Sevinger ta un sospechoso y a opta pa core e risico cu nan lo deten’e den pleno campaña. Den e caso di Paul Croes na 2017, no a pone riba lista mes. E biaha aki a opta pa move Sevinger di # 2 pa # 29 riba lista. Pero e hecho cu a lag’e toch riba lista, a pone henter e partido bou presion. Bayendo eleccion cu un sospechoso riba un lista politico ta un decision cu partido mes a tuma y no por culpa husticia awo pa decision cu mester tuma pa bon di e investigacion y no pa eleccion.
Con cu bay bin, e hues-comisario awor ta hay’e ta haci hopi evaluacion pasobra esaki lo no bira djis un suspension di detencion. E ta determina e futuro di Benny Sevinger den politica y den su trabou pa e siguiente cuater añanan. E no tin otro tabou cu no ta politica, pues si strob’e den eleccion awe, lo strob’e den su carera pa e proximo cuater añanan. Pues e hues-comisario lo tene cuenta cu si e caso lo no bin dilanti awo ainda toch y si e chens pa condena Sevinger no ta mucho grandi, pakico stroba henter e proceso electoral di nos pais.
Na final di dia awe, un partido lo ta contento y otro lo ta rabia, pero e decision di awe lo ta “un pa tera y un pa lama”. Esunnan cu ta sigui politica di cerca ta insisti cu si Sevinger sali liber prome cu eleccion, cu e lo influencia su campaña y esun di AVP den forma positivo. Pero si e keda cera pa eleccion, cu esaki lo tin un influencia negativo pa Sevinger mes y pa henter partido. Awe Ministerio Publico y politica ta depende di un decision di un hues-comisario, mientras cu ambos a hinca nan mes deliberadamente den e posicion incomodo aki…tur pa midi forsa den port’i eleccion!
