Un rato pasa hues-comisario mr. Jane Jansen a informa e sospechoso di husticia, Benny Sevinger, su abogado mr. David Kock y fiscal di Ministerio Publico cu e no ta bay di acuerdo cu peticion di Sevinger pa suspende su detencion. Como tal, a honra peticion di fiscal pa mantene Benny Sevinger cera pa un maximo di 60 dia mas. Si na e momento ey ainda e caso no ta cla, por bolbe pidi prolongacion di 30 dia mas di encarcelacion, pa yega te dia e caso presenta dilanti mesa berde.
Den e evaluacion, hues-comisario mr. Jane Jansen a tene cuenta cu e informacion suministra na dje y e circunstancianan actual den e caso, considerando e seriedad di e hechonan, cu no tin motibo valido awor aki pa bay di acuerdo cu e peticion pa suspende detencion di e sospechoso. E interes di e procedura penal ta pisa hopi mas cu e interes personal di e sospechoso.
Mester menciona cu e procedura penal a start na momento cu a detene e parlamentario, a dun’e dos dia, despues a prolonga cu ochi dia mas. Na e momento ey por a pidi pa dos bes ocho dia, pero fiscal a pidi hues-comisario pa dun’e 16 dia mesora. Prome cu e dianan a yega, ya Ministerio Publico a laga sa cu e lo pidi 60 dia mas. Husticia a keda riba su liña, esta cu kier wanta e sospechoso cera te dia su caso bin padilanti. Esey obviamente no tin un fecha fiho pe ainda pero lo por dura.
E hecho cu hues-comisario a prolonga e detencion no kiermen precisamente cu Sevinger mester keda cera pa henter e 60 dianan. Por sosode cu e siman cu ta bin ainda, a base di circunstancianan nobo, cu fiscal mes por acudi na hues-comisario a pidi pa awor si suspende e detencion. Ta algo cu a sosode cu casa di Benny Sevinger mes y despues cu Pieter Susebeek tambe. Pero den e caso specifico aki, e chens cu esey lo sosode ta masha chikito mes.
Pa partido AVP, esaki ta nifica bay eleccion cu 28 candidato liber y un candidato encarcela y cu status di sospechoso. E ilusion cu hopi lo tabatin cu Sevinger lo recobra su libertad den algun dia, awe ta diferente cu e decision di corte.
E CASO AVESTRUZ
Ministerio Publico a informa dia 2 di october 2019, dia cu a haci e entradanan hudicial, cu Landsrecherche hunto cu hues-comisario y den cooperacion cu Cuerpo Policial di Aruba, ta investigando posibel delitonan di corupcion y otro hechonan castigabel, posiblemente cometi relaciona cu otorgamento di terenonan di gobierno. Mas concretamente: E investigacion ta dirigi riba e pregunta cu si un of mas compania a obtene, a base robes, (un opcion riba) derechonan di erfpacht di terenonan di pais Aruba den e añanan 2009 te 2017.
TOCANTE BENNY SEVINGER
Oslin Benito Sevinger, miho conoci como Benny, di 56 aña di edad, un karateka, a subi lista di partido AVP den eleccion di aña 2001. Prome cu esey e tabata traha como consehero di Minister Watty Vos (qepd) y ora cu e ultimo aki a fayece na 2001, a dicidi di pone Sevinger riba lista, den representacion di “e hendenan di Watty”. Su carera tabata semper impresionante.
- Eleccion 2001 – 1493 voto
- Eleccion 2005 – 1403 voto
- Eleccion 2009 – 2072 voto
- Eleccion 2013 – 3932 voto
- Eleccion 2017 – 2785 voto
Benny Sevinger ta casa di Claudia y tin dos yiu, Stephany y Brain. Bou su maneho, a desaroya proyectonan historico pa nos pais, manera ta renobacion di aeropuerto, hospital, Green Corridor, ringweg 3 esta Watty Vos Boulevard y tambe e proyecto di renobacion y embeyecimento di centro di Oranjestad, cu a inclui adkisicion di un tram.
