A drenta algun informacion sumamente desagradabel pa nos isla, y esaki tin di haber cu Fitch Ratings, cu a downgrade Aruba.
Lider di AVP, Mike Eman a splica na bispo di un expresion nacional di e pueblo Arubano di preocupacion pa loke ta e rumbo di nos pais, ta hayando awor internacionalmente confirmacion di e preocupacion di unda Aruba ta bayendo.
A mira poco tempo eynan e presentacion di IMF cu a confirma cu e economia di Aruba ta cayendo y cu e maneho dirigi riba aumento di gastonan di gobierno y tapa esakinan cu medidanan, ta un direccion robes pa e capacidad di e economia di pais Aruba y awe ta haya Fitch Ratings, ta publica cu Aruba tin un negative outlook.
AVP a laga Aruba cu un positive outlook pero cu e mesun rating. Segun Eman, a laga Aruba cu un outlook stabil y despues positive. Durante gobernacion di MEP, el a bira negative na momento cu a tuma medida. A bisa cu e lo ta negative pa un rato pasobra a duna medida y depsues lo bira stable of positive atrobe, pasobra e medidanan lo bay surti efectonan positivo, segun e vision di e gabinete aki.
Awor e di dos c ta sali ta bisa cu mantene outlook negativo, pasobra ta mira cu e impacto di e medidanan tabata un perdida grandi di poder di compra. Manera cu a presenta diferente biaha den conferencianan di prensa, rapportnan di Centrale Bank ta mustra, cu economia di pais Aruba ta cayendo, pasobra e poder di compra di nos conciudadanonan ta cayendo, pa motibo di e politica di e gobierno aki di impone medida, sin tin un vision, un vision economico, con ta hiba Aruba p’adilanti, con ta inspira nos pueblo pa kere den futuro di pais Aruba, con ta inspira esnan cu tin cu inverti den futuro di nos pais y esey ta conduci na un desaroyo hopi negativo pa pais Aruba. Y awe ta haya lamentablemente confirmacion di loke cu AVP a bin ta bisando cu locual e gobierno aki ta haci, aumentando nan gastonan pa amigo, familiarnan y sak’e for di saco di nos conciudadanonan, supuestamente pa paga debe y awe ta e resulta cu esey no ta e caso.
Fitch ta bisa tambe cu ta mira un outlook negativo, esta e desaroyo ta bayendo den un direccion robes y pa e motibo aki mas cu nunca, tin cu demostra na comunidad cu AVP ta para hunto cu nan, ta compronde nan dolor, ta compronde nan inkietud, ta mira e pobresa cu ta creciendo rapidamente den nos comunidad. Ta mira e caida di nos economia y ta na AVP pa sali pa e pueblo y awe sigur ta un dia cu lo sali en grande. Pero ta lamenta si cu den un poco tempo, un trabao grandi cu a haci durante ocho aña di coy Aruba su economia, caminda cu tabata tin caida di turismo, cu tabata tin perdida di poder di compra, tabata tin desempleo, a cambia e rumbo di e pais pa uno cu prosperidad, y den menos cu un aña of un aña y mey, Fitch ta bisa cu Aruba ta riba un rumbo robes y esey ta sumamente preocupante. Pesey awe mas cu nunca mester ta uni cu e pueblo aki pa por haci e diferencia pa pone Aruba bek den un bon direccion.
Mescos cu a mira Hulanda su intervencion na Corsou den añanan di gabinete Pourier, caminda cu a oblig’e e tempo ey pa a tuma medida riba e pueblo di Corsou, retira un cantidad di personal di gobierno, bin cu tur tipo di medidanan similar, manera BBO y redoblacion di BBO y Corsou a cay desde di e tempo ey, no pa culpa di sr. Pourier, kende tabata un bon dirigente, pero e tabata forsa door di Hulanda, cu no ta realisa cu e pueblonan di nos islanan, nan margennan di por absorba medidanan ta totalmente diferente cu un pais manera Hulanda, caminda cu tin hopi vet.
Cerca nos tur hende ta sobrebibi y na momento cu corta den e cuero di nos hendenan, b’a yega weso di biaha. Na momento cu corta den cuero di hasta empresanan chikito na Aruba, bo ta yega weso di biaha pasobra no tin tanto pa bo por corta.
Pesey tin cu hiba un maneho mas manera e gabinete di AVP a hib’e, cu dialogo social, caminda cu ta haci algun cos cu mester haci. Por ta un tiki peso, pero na un otro banda ta haci cosnan cu ta duna estimulo na economia, manera cu a haci cu reparatietoeslag, reduccion di awa y coriente, cambia e formato di hopi cos cu ta un peso riba esnan cu ta carga e economia di Aruba, pa duna prosperidad na un y tur, mientras cu bo ta consolidando bo finansas publico.
Lamentablemente esnan cu ta bin de paso na Aruba, un IMF, of un gobernante Hulandes, ta simplemente kere cu por impone medida y cu esey bo ta yuda e caha di gobierno. Hasta ta mustra e tipo di impuestonan aki, na cierto momento ta pasa e punto cu pueblo no por paga mas, ni cuanto subi e porcentahe, e resultado final ta mustra cu tin menos entrada.
Cifranan cu tin di BBO ta indicando cu nos ta bayendo den e direccion eynan, caminda cu e porcentahe cu a redobl’e cun’e, no ta refleha den e cantidad extra cu ta hayando. A mustra cu ta purba di saca algo cu no tey y asina ta strangulando e economia di pais Aruba. Esey ta e realidad cu conoce door di conoce e economia di nos pais, conoce e capacidad di poder di compra di nos ciudadanonan. Esnan cu no ta interesa den esey ta tuma e pakete di medidanan manera nan ta haciendo y ta conduciendo na un pobresa grandi.
