Diaranson a cuminsa cu tratamento di presupuesto 2022 y fraccion di AVP ta sumamente preocupa.
Lider di fraccion mr. Mike Eman a comenta cu tin hopi dolor y pobresa, necesidad den comunidad. Y medida tra’i medida ta empeorando e situacion. Awe lo trata un presupuesto cu enbes di trece alivio, lo bay aumenta ainda mas e cantidad di medida cu tin riba nos comunidad.
E peso cu nos tin riba nos comunidad y ta bay kita un cantidad di servicio, asistencia cu nos comunidad normalmente por conta riba dje for di gobierno, cu den e presupuesto aki ta bay corta severamente.
AVP no ta para su so den e preocupacion grandi cu awe henter Aruba ta sinti, pero tambe e organo mas halto di conseho di pais Aruba (Raad van Advies), a conseha gobierno di Aruba pa no presenta e presupuesto aki.
Den su conseho Raad van Advies ta bisa cu gasto total den presupuesto 2022 ta mas halto cu nunca. 143 miyon mas cu na aña 2017.
Ta bay tin un lucha grandi un biaha mas di e direccion di gobierno pa presenta den un forma hopi cla, cu esaki ta un direccion cu ta bay sofoca e pueblo ainda mas. Un economia asina fragil caba, un poder di compra totalmente afecta, pobresa den cada skina di nos pais. Nos hendenan tur dia ta lucha pa busca na unda nan ta haya pa por paga p’e siguiente recibo di awa, luz, nan cas, nan auto. Si mira e cifranan di CBS ta mustra cuanto e existencia basico a subi durante e ultimo cuater añanan di Evelyn Wever-Croes. Tur medida tuma y e medidanan cu tin na caminda pa tuma awo, ta sofocando e pueblo aki.
Lo hiba un lucha grandi y lo demostra un biaha mas, manera cu fraccion di AVP, partido AVP semper a haci, cu tin un otro caminda pa cana. Tin un alternativa pa cana pa percura pa un perspectiva nobo cu e economia di Aruba. Pa por revitalisa e desaroyo social-economico di nos pais. Pa duna nos hendenan un oportunidad atrobe pa hiba un bida husto den e pais aki, ta loke lider di fraccion di AVP, Mike Eman a comenta.
Pa mayor cobertura lesa TREMPAN.
