Nos bida spiritual y nos relacion cu Dios ta algo cu nos mester tuma hopi na serio y confia den Señor completamente como nos Salbador, Sanador y nos Libertador.
Pasobra den Señor nos Dios nos tin tur locual cu nos mester. P’esey e palabra ta bisa cu tur cos nos por den Cristo cu ta nos fortalesa y asina cu nos pone esey un banda y cuminsa haci cos cu no ta cuadra cu boluntad di Dios nos ta den rebeldia.
Hopi biaha nos ta tende un persona a core auto bou di influencia di alcohol y ranca un palo di luz of el a causa un accidente y a keda herida y e ta hopi malo den hospital.
Nos oracion ta pa pidi Dios pa sana e persona pa e persona bira bon y sigui den su bida cu su famia, pero nos oracion mester ta pa e persona bira bon, arepenti y entrega su bida na Señor y asina stop di bebe pa asina e no causa ningun accidente mas ora e ta burachi.
Hopi hende ta biba comfortabel cu un alivio temporal manera hende cu ta bebe paracetamol of calpol of cualkier otro tipo di calmante, en bes di busca nan sanacion of liberacion.
Nos tin un Dios cu no ta duna alivio, E ta haci un trabou completo den nos bida si nos arepenti, kere y reconoce Su poder y autoridad.
Den Marco capitulo 5 vers 23 e oficial di snoa cu yama Hairo a roga Hesus bisando mi yiu muhe chikito ta cerca di muri, por fabor, bin pone bo man riba dje pa e por bira bon y biba. Hairo a pidi Hesus pa haci un trabou completo, pasobra e tin confiansa cu Hesus por.
Y den mesun capitulo na versiculo 28 e muhe cu tabatin derame di sanger y cu a sufri hopi na man di dokternan a bisa: Si mi djis mishi cu e zom di su bisti, lo mi bira bon. E muhe a declara sanacion pa medio di fe y a ricibi sanacion.
Ora nos ta pidi Dios algo no ta manera nos ta pidi hende, pasobra Dios tin tur poder y tur autoridad. Den Su Palabra Señor ta bisa cu tur cos ta posibel pa esun cu ta kere, p’esey nos mester specifica kico nos kier pasobra nada ta imposibel pa Dios.
Ora nos tin un dolor nos mester pidi pa sanacion y no djis pa e dolor pasa; nos mester kere pa un sanacion completo.
Den Isaias Capitulo 41 vers 13 Dios ta laga nos sa ken E ta y kico e por haci pa nos y Señor ta bisa: Pasobra Ami ta Señor bo Dios, Kende ta sostene bo man drechi, Kende ta bisa bo: No tene miedo, lo mi yudabo.
Ora bo yui tin mal amistad y ta cana den gang, bo ta pidi Dios pa nan tur arepenti y bini riba e caminda di berdad y bida y sali for di den scuridad ,pasobra tanto bo yiu y esunnan den grupo mester wordo salba. Nan mester wordo ranca for di gara di diabel.
Pasobra nos no por tolera presencia di maldad banda di nos yiunan. Nos mester coregi e asunto ey.
1 Pedro capitulo 5 vers 8 ta bisa: Sea sobrio, sea alerta; boso adversario e diabel ta cana rond manera un leon cu ta gruña, buscando ken e por traga.
Awo nos tur sa con nos tin cu haci oracion.
Sinceramente,
Pastoor Marcel Balootje.
