Den un informacion nobo publica, tin poco mehoracion pa loke ta e proteccion di e personanan Venezolano. Amnistia Internacional a conclui cu e situacion dje personanan Venezolano cu ta busca proteccion na Corsou no a mehora substancialmente desde e publicacion di informe Sin siguridad ainda na 2021. A pesar di e pasonan chikito cu e autoridadnan di Corsou a dal, nan ta sigui nenga proteccion na persona Venezolano, entre nan mucha homber y mucha muhe, y ta sigui detene automaticamente den condicion inhumano.
Amnistia Internacional a haci durante mas di un aña e siguimento di e casonan di cuater homber y un muhe cual historia mester ta inclui den e informe di 2021. A entrevista nan un biaha mas entre december 2021 y october 2022. Su situacion den e ultimo aña no solamente no a mehora, sino cu a bira pio den algun caso, manera di Yusmary, kende tabata deteni relaciona cu inmigracion cinco luna na 2022, of di Jose, kende despues di tabata deteni casi un aña na 2020 y 2021, ainda no tin noticia di su solicitud di asilo. “Mi ta sinti mi cera ainda a pesar cu mi no ta den prizon mas. Mi no kier keda na Corsou. Mi kier bay otro pais y pidi eynan asilo”, el a bisa.
Motibo principal di preocupacion ta persisti
Mas di shete miyon di persona Venezolano a huy di e crisis di derechonan humano den su pais, loke ta bira e crisis aki di desplasamento forsa den un dje mas grandi di mundo. Corsou, isla Caribense cerca di Venezuela cu ta pertenece na Reino di Hulanda, ta un di nan pais di destino. Ta calcula cu tin 17.000 persona Venezolano cu ta biba den un situacion migratorio iregular n’e isla.
Amnistia Internacional ta reconoce cu e autoridadnan di Corsou a dal paso chikito pa mehora e situacion di derechonan humano di e personanan Venezolano cu ta busca proteccion. Na 2019 nan a establece un procedemento di proteccion cu a mehora e entrevistanan destina na evalua e necesidadnan di proteccion internacional. Sinembargo, ainda ta sigui dificil yega n’e procedemento aki, pasobra e autoridadnan no ta garantisa e acceso di informacion y na asistencia huridico, specialmente e personanan deteni pa motibo di inmigracion. Di otro banda, ni un persona a ricibi proteccion desde introduccion di e procedemento aki, pues e autoridadnan ta considera cu e personanan Venezolano no tin necesidad di proteccion ni ta core peliger si nan ta debolbi na nan pais. Den practica, e procedemento di proteccion ta uza como un vehiculo pa nenga e solicitudnan di proteccion, loke ta contrario na su propio finalidad.
