Diadomingo atardi bomberonan a sali cu urgencia den direccion di Palm Beach. Informacion a drenta cu na Palm Beach 104 tin un auto na candela. E auto ta para bou di un afdak y ta e garashi di e auto.
Ora bomberonan a yega tabata e auto A-60010. E momento ey ya caba e doño a paga e candela. Por a mira na e daño cu tabata trata di un candela basta grandi. Tur cos bou di e tapa di motor a kima. E auto no ta sirbi mas. Un corto circuito lo a causa e candela. E doño a habri e tapa di motor y pone un palo pa tene habri y cu slang di awa di cas a bay den accion pa paga e candela.
Bomberonan tambe a uza e mesun hose di awa di e cas pa tira poco awa mas riba e motor cu a kima. Djey cu nan mesun slang di awa cu mas presion a basha poco awa mas parti abou pa asina ta sigur cu tur cos ta ok.
Bomberonan kier a saca e auto for di bou di garashi pero e stuurwiel ta na lock y ni cu su yabi kier a los. Finalmente a avisa polis tambe. Polis a yega pero ya tur cos a caba y bomberonan a bandona e sitio.
