Recientemente 24ora.com a publica un encuesta riba e desaroyo di Isla di Oro. Comerciante local a cumpra e propiedad y ta cla pa desaroy’e. E desaroyo di Isla di Oro a trece hopi discusion den comunidad, pa cual a duna pueblo e oportunidad di comenta kico nan ta kere cu tin cu haci cu Isla di Oro. Por lo menos un posibel candidato di AVP a comenta con e lo soluciona e situacion di Isla di Oro. Terrance Ras di AVP a comenta riba e encuesta bisando: “Hasie mane un campo alegre lew for di nos bario di San Nicolas i lew for di bista di mucha ora bo pasa ku auto den kajanan di pariba. Saka hanchi for di San Nicolas pa nos por crese i lage bai ejnan.”
Ras ta kere cu move e industria di prostitucion for di San Nicolas pa Isa di Oro, ta e miho cos cu por haci pa San Nicolas. Ta bon pa enfatisa cu Campo Alegre di Corsou tin hopi aña cera, debi cu Ministerio Publico a persigui e doñonan pa labamento di placa y negoshinan ilicito eyden y rond di e negoshi di prostitucion. No obstante cu e ta cera na Corsou, Terrance Ras di AVP ta imagina cu aki na Aruba si un formula asina lo por funciona.
Posibel candidato politico
Tabata dia 5 di maart ultimo cu AVP a presenta algun cara nobo cu posiblemente lo subi lista di AVP den e proximo eleccion. Entre nan a presenta, Chris James, Terrance Ras y Joselito Dirksz. Di e tresnan ey, ya tin un cu a dal un stap patras caba despues cu e influencia politico a afecta su progreso den su trabou como funcionario publico. Tanto Ras como James tabata campañado di Mike de Meza di San Nicolas. Ambos a parece riba varios video di AVP, postulando nan mes como e solucion pa San Nicolas. A mira nan na Lago Heights Park ta cuestiona e maneho di Gobierno pa cu e parke pero tambe n’un scol pariba di brug cu ta falta di atencion. No ta for di awo ta mira nan “den pi’i partido AVP”. E echo cu Ras ta kere cu Isla di Oro ta e sitio ideal pa un centro di prostitucion, ta un idea cu te ainda nos no a scucha.
Tocante Terrance Ras
Terrance Ras a bira conoci cu su proyecto di ‘Leap of Faith’, caminda su idea ta pa crea un pier cu ta baha den awa, brindando personanan cu ta den rolstoel of cu tin limitacion fisico e oportunidad pa haya acceso na lama. For di riba e pier por haci ehercicionan di terapia den lama. Como cu den awa e curpa ta pisa menos cu pafo di awa, e ehercicio por bay mas facil. Te ainda no a mira cu a concretisa e idea aki. Tur cos ta indica cu pa falta di permiso, te ainda no por a sigui cu su proyecto, pa cual el a cambia di idea y convertie den un politico.
Tocante e situacion actual di Campo Alegre:
Despues cu Shell a habri na aña 1920, a urgi e necesidad pa tin muhenan pa sacia e sed sexual di e trahadonan den refineria. Tabata trece hende muhe for di Venezuela, Colombia y Republica Dominicana. Cu yegada di e Hulandesnan y Mericanonan pa defende nos islanan durante e di dos guera mundial, e necesidad a crece mas. Gezaghebber a prohibi prostitucion riba caya pero e control a bira imposibel. Un comision forma pa Gobierno pero cu representante di polis, salud publico y clero a conseha finalmente pa habri un centro y concentra prostitucion eynan so.
Asina Campo Alegre a habri su portanan oficialmente dia 30 di mei 1949 na Sero Fortuna. E prome prostitutanan a bin for di Cuba y Venezuela. E damitanan por a keda pa tres luna y mester a bay bek. Ta calcula cu entre 1949 y 1996, a recluta mas o menos 25.000 hende muhe como prostituta den Campo Alegre.
Na maart 2020 a cera Campo Alegre debi na Covid-19. Tres luna despues, na juni 2020, el a bati bancarota. Tur 150 prostituta y 84 trahado adicional a keda riba caya y sin trabou. Den e proceso Ministerio Publico a ehecuta e sentencianan den e caso penal contra e doñonan y a tuma e propiedad den beslag y abend’e na findishi.
Na september 2023, Gabinete Pisas di Corsou a cumpra e propiedad na findishi. Tabata pidi 8.9 miyon florin p’e pero gobierno a cumpr’e pa 8 miyon florin. A keda di deposita e placa den e “Criminaliteitsfonds”. Te ainda no a haci nada cu ne.
Tocante AVP
J.H.A. “Henny” Eman a funda “Arubaanse Volks Partij” (AVP) na aña 1942. Lidernan desde fundacion tabata J.H.A. “Henny” Eman (welo), Cornelis A. “Shon A” Eman, Dominico Guzman Croes, Rudy Frank, Chibi Croes, J.H.A. “Henny” Eman, Robertico “Tico” Croes y M.G. “Mike” Eman. Na tur a participa den 28 eleccion. Record maximo di voto: 33,103 (2013) y record minimo di voto: 1209 (1977). Den ultimo eleccion na juni 2021 e partido a logra 18.335, bayendo atras di e partido mas grandi pa ocupa e di dos luga awo y bahando di 9 pa 7 asiento den parlamento. No a dura mucho cu dos Miembro di Parlamento, Gerlien Croes y Rycond Santos do Nascimento a tuma nan retiro di AVP y bira parlamentario independiente, lagando AVP cu no menos di 5 asiento den Parlamento di Aruba. Ideologia di AVP ta Regional, Democrata Christian & Conservatismo.
