Diadomingo atardi pa mas o menos 3:30 pm, un auto a bolter den Rancho Straat. Chauffeur di un auto marca Chevrolet modelo Aveo numera A- 27921 pa un motibo of otro a bolter den Rancho. Tabatin dos auto staciona band’i caminda cu a ricibi sla. Chauffeur di e auto a conta cu na momento cu el a lora pa drenta Ranchostraat, solo a dal den su cara, cu el a perde visibilidad, a bay den un scual, a perde control riba e stuur, dal den autonan stacionan den banda y despues bolter.
Un auto marca Mitsubishi modelo Colt a bay dal tras di un Nissan cu tabata staciona su dilanti. E doñonan di e Nissan numera A-67401 tabata presente na sitio mirando cu ta ey mes nan ta biba. Ambos auto tabata staciona di basta rato caba den e caya, ora cu diripiente e auto a bin dal nan tras pa despues bay bolter.
Na momento cu polis a polis a presenta na sitio, ya caba e chauffeur a logra sali for di e auto. E chauffeur, un hende homber, tabatin unicamente herida na su man. Ambulance a presenta na sitio pa atende cu ne. El a prefera di ricibi tratamento medico na e sitio mes den a ambulance, sin cu mester a bay hospital. Daño material ta considerabel.
