Henter e ekipo di Aruba Tourism Authority a para strategicamente awe pafo di nan edificio riba L.G. Smith Boulevard pa saluda e
Famia Real na nan yegada. Bisti cu flanel color oraño, e empleadonan a yama e bishitantenan bonbini y a ricibi un saludo bek di tanto Su Mahestad Rey Willem-Alexander, Su Mahestad Reina Maxima y Su Altesa Real, Prinses Amalia.
E bista di tur e empleadonan para pafo, bou di e bandera di Hulanda, a forma un extra imagen di “bonbini” na e Famia Real. Den e bus a splica nan cu esey ta ATA, e instancia cu ta “carga” economia di nos pais door di promove y administra nos turismo, e unico pilar economico di Aruba.
Den nan man y bou direccion di Ronella Croes, e team di gerencia y cada un di e profesionalnan trahando eyden, a percura pa un crecemento impresionante di turismo di nos pais desde aña 2011. Dia a funda ATA, Aruba tabata conta cu 868.973 turista pa aña y na 2022 Aruba a cera aña cu 1.100.997 turista. Bou e “ATA” nobo turismo a crece cu mas di 25%. Y no solamente den cantidad, sino tambe den e loke cada turista ta ‘laga atras’. Tourism Receipt na 2011 tabata 2.5 biyon florin, mientras cu aña pasa e tabata 4.3 biyon florin!
Probablemente e Famia Real mester por a tende di e campaña “Het Aruba Effect”. Na mei 2022 a lansa e campaña ey na Hulanda. E compania di publicidad “Engine” a diseña e campaña pa Aruba Tourism Authority. A aplic’e na Merca pero na Hulanda mes tambe. Den e campaña Aruba ta capitalisa riba e sentimento cu Aruba ta crea cerca e turistanan ora nan ta di bishita na e “One Happy Island”. E sentimentonan aki ta keda cerca e bishitante te hasta ora e bay cas bek.
Aruba Tourism Authority como organisacion mes ta existi desde aña 2011 pues, 12 aña caba. El a desaroya bira un entidad riba su mes cu ta conta cu entrada na impuesto di turismo di riba 100 miyon florin pa aña. Ta trata aki di 86 empleado parti den nan ofininanan situa na Aruba, Merca, Hulanda y Colombia. Hunto nan ta percura pa promove nos isla door di campañanan di mercadeo y door di inverti localmente den e producto turistico.
