“No tin nada pa prueba cu mi ta culpabel. Tur movecion di placa ta cuadra cu e rapport di accounting. Esaki no tin nada di haber cu placa, pero un wega politico pa kibra Alan Howell, un wega di politica sushi”. Esaki e ex-parlamentario di partido POR, Alan Howell, a bisa den su ultimo palabra den corte diabierna ultimo.
Durante dos dia Corte di Husticia a trata e caso Diamanta den cual tabatin dos acusado; e lider di POR, Alan Howell y tesorera di e fundacion di POR, Jacqueline van Putten. Pa e prome a pidi un castigo di 2 aña di prizon y pa e tesorera a pidi 200 ora di trabou pa comunidad of 100 dia cera; 3 luna condicional y tres aña di prueba.
Prome cu a cera e ultimo sesion di diabierna, Alan Howell tabatin chens pa bisa su ultimo palabra y den e minuutnan aki el a describi un scenario cu e ta bisa tabata motibo pa kit’e for di caminda, politicamente. Esaki tur pasobra el a bira un peligro pa otro partidonan. “Mi ta lamenta cu pa motibo di politica mi ta sinta aki awe. Si bo bira un peligro, nan ta purba corta bo y esey nan a haci cu mi, ” el a cuminsa bisa na Papiamento.
Tur cos tin di haber cu e echo cu el a nenga di subi lista di partido MEP. “Mi a nenga di bay riba lista di MEP y e partido aki kier a kibra POR pa e candidatonan pasa pa Partido MEP. Esey tabata e plan di Evelyn Wever-Croes y Andin Bikker.”
E asunto a sigui ora cu a scog’e como lider di POR. E persecucion a sigui ya cu MEP tabatin miedo cu su persona ta bay forma Gobierno cu otro partido politico. “E cos aki a bira manera un heksenjacht” ora cu el a ricibi e suma di 50 mil florin cash for di e fundacion. Ora cu su tata a cuminsa traha cu ne como su consehero, no a haya placa di Parlamento ainda y el a adelanta e pago aki. Y dado momento e fundacion mester a dun’e e placa bek. E ta haya hopi lamentabel cu ora cu e situacion aki a surgi, su persona como lider di POR no por a duna un splicacion na pueblo.
Pero tambe el a señala aspectonan cu el a haya hopi straño. Por ehempel, Landsrecherche a yam’e pa combersa riba e asunto aki. Pero nan no tabatin e administracion di e fundacion pa haci pregunta. Con nan ta bay haci pregunta si no tin esaki. “Nan a daña mi nomber den comunidad. Na mi opinion, Prome Minister y Minister Andin Bikker a traha hunto den esaki,” Howell a bisa. A pint’e scur, prensa liga na gobierno tabata suministra informacion di e investigacion cu e mes como sospechoso no tabata na altura di dje. Tanto Gobierno como Ministerio Publico a causa hopi daño na su imagen. El a hay’e obliga di splica kico a pasa den un conferencia di prensa pero e daño tabata causa caba.
Otro aspecto straño ta con lihe tur cos a bay. Na mesun momento cu el a haya sa cu e ta un sospechoso, ya caba Prome Minister tabata canando bay Gobernador pa baha Gobierno y Ministerio Publico a saca un declaracion. “Na mi opinion, nan a traha hunto den esaki,” e acusado a bisa. E minister-president a baha e Gobierno sin bay Parlamento prome.
Tambe e tabatin critica riba e forma di proceder di Landsrecherche. El a splica hues cu e tin binti aña trahando como polis y sa con interogacionnan mester tuma luga. A cuestiona cu Landsrecherche no kier a scucha su testigonan. E ta kere cu polis mester busca pa sa si tin un delito cometi of no, pa ora e dossier ta cla cu tur cos di ambos banda dicidi si ta acusa un persona. Den su caso esey no a sosode.
El a splica e magistrado di con e caso a afect’e y su famia y e efecto cu esaki tin riba su ambicion politico. Na final el a bisa “mi ta pidi hues studia tur aspecto y declara mi liber.”
