Entre e informacionnan cu Aruba Tourism Authority (ATA) a comparti e siman aki den un presentacion special pa prensa local, a comenta riba e posibel efecto cu ley di reforma fiscal por tin pa e industria turistico. CEO Ronella Croes a indica cu ta bay monitor di cerca loke e aumento den Room Tax, pero tambe inflacion y un mayor esfuerzo den recoleccion di impuesto for di e sector di acomodacion alternativo (Airbnb) ta bay nifica pa e entrada di turismo pa Aruba y pa e presupuesto di ATA.
E topico ta un dialogo cu ATA ta hibando den fin di 2021 cu diferente stakeholders; mescos cu e ta masha comenta tambe den seno politico y entre ciudadanonan mes den ultimo lunanan. “Conforme nos sigui tuma paso cu ta subi e gasto di un vakantie pa Aruba, nos mester ta consciente y alerta di ki ora esaki por causa un impacto negativo riba demanda,” asina Croes a comenta.
Otro motibo cu ATA ta den dialogo p’e, ta uno cu ta afecta e presupuesto di ATA directamente. E entidad a boga pa di e tarifa nobo di 12.5% cu ta cobrando desde 1 di januari 2023, nan ricibi un minimo di 7.5%. Sinembargo e decision a cay pa e share di ATA yega te na7.1%. Esaki ta obliga ATA na tuma paso necesario pa recorta of pone pausa den cierto plan y operacion pa wak prome con e patron financiero ta desaroya bou di e condicionnan nobo.
Mientras tanto, ta spera yegada di e cifranan di prome trimester 2023 pa haya un bista di e efectonan cu reforma fiscal por tin. “Nos ta djis bisa cu mester di un tiki cautela,” e CEO a bisa ya cu mientras awo ta papia di recorta, “kizas entrada ta drenta mas halto di loke nos a presupuesta; e ora ey bo por cuminsa introduci algun flexibilidad.”
Pa e relato completo, lesa edicion di TREMPAN
