Siman a habri cu un noticia alentador pa un y tur. Un otro yiu di tera a sa di saca cara di nos dushi isla den exterior un biaha mas. Mas cu claro, esaki ta algo di admira den tur aspecto y semper nos di 24ora.com ta percura pa trece e acontecimentonan aki tambe pa nos lectornan. E biaha aki t’e hoben Derwin Tromp a sa di demostra cu pasion y dedicacion ta hacie posibel pa surpasa tur obstaculo y logra obtene un diploma na Hulanda.
Derwin Tromp ta un hoben Arubiano di 29 aña di edad cu recientemente a logra completa su estudio den Software Engineer na Saxion University of Applied Sciences na Enschede, Hulanda. Originalmente, e estudio aki tin un duracion di cuater aña, sinembargo, Derwin a dura un poco mas den esaki debi na e pandemia y e complicacionnan cu esaki a trece cu ne. No obstante, esaki no a kita di su orguyo ni tampoco di su famia, kende ta felicita Tromp di su logro y ta sinti un orguyo inmenso.
Desde un edad hoben Derwin tabata gusta tur loke tin di haber cu computer. Ta asina el a bay Hulanda pa sigui su pasion escogiendo un estudio den cual e por a amplia su conocemento den e area aki. E semper a gusta programa y e proceso di automatisacion. Pa su proyecto final Derwin a desaroya un programa cu por controla un robot pa su universidad mes, como parti di un grupo di investigacion yama Saxion Mechatronics. Aki nan tabata buscando un programa pa un robot por coy un appel y hinca esaki den un makutu. Despues di algun luna ta haci investigacion, Derwin a logra completa e programa exitosamente.
Segun Derwin a conta nos, ya e ta papiando cu un compania na Hulanda pa ora e regresa for di un vakantie breve na Aruba, e por cuminsa den e mundo di labor y aplica su conocemento y experticio den e area tecnologico, enfocando riba e parti di automatisacion, robotics y inteligencia artificial. Eventualmente e lo desea di start un compania di su mes na Aruba den e area di automatisacion.
Pa un relato mas amplio lesa edicion di TREMPAN.
