Awe mainta Corte den Prome Instancia a dicta sentencia den e caso di Nixel Scholten. E ta acusa di a viola su ex-casa, maltrato di su propio mama como tambe menasa e pareha di su mama. Scholten ta naci dia 4 di januari 1991 y actualmente e ta den KIA. Hues a splica Scholten, kende a atende via video conference, cu corte a haya tur tres acusacion legalmente y convencemente proba.
Segun e hues a sigui splica, ta trata aki di tres hecho castigabel, cual automaticamente ta haci cu Scholten ta bira un sospechoso castigabel tambe. E violacionnan a tuma luga den e periodo di 2017 pa 2020, ora cu ainda e tabata casa cu su denunciante. Y e maltrato di e mama na 2016. Nan no kier a entrega keho prome pa miedo. Ademas, door cu e ta polis, a pensa cu no lo actua riba esaki.
Na februari caba corte a trata e caso aki caminda fiscal a pidi 48 luna, di cual cuater luna ta condicional y tres aña ta di prueba. Asina hues a dicta awe e sentencia ekivalente na locual fiscal a pidi y a dicta como condicion special cu Scholten lo mester bay bou di guia di Reclassering pa su adiccion na alcohol. Scholten tin dos siman pa apela riba e sentencia.
