E delegacion di cinco atleta y un coach di taekwondo a regresa fo’i Mexico. Pa tres siman nan a bay Monterrey pa prepara. Aki nan a bay un training camp pa prepara, pero na mesun momento tabatin fogeo cu nan a participa. Tur esaki tabata enconexion cu nan preparacion.
Monica Pimentel, coach di Impact Taekwondo y Pre-seleccion di ATB, a indica di haya cu e preparacion a bay hopi bon. Un par di nan tin hopi experencia den training camp mientras un par di nan ta mas nobo den esaki. E no ta algo facil, pero e ta importante pa nan por sigui progresa den e deporte.
Loke e atletanan por a haya mas dificil den e training camp, Pimentel ta di pensamento riba e parti di volumen di training. Manera a haci na Costa Rica e atletanan ta custumbra desde algun luna caba cu training di dos biaha pa dia, den preparacion p’e Panamericano do 2023 na Chile. A sigui cu e training di dos biaha pa dia y un poco mas di ora. Tambe nan mester a adapta e cantidad di fogeo.
El a splica cu pa dia nan por a haya dies mucha of diferente pelea. Esey ta e parti di mas importante. Segun Pimentel, esey tabata e motibo cu nan a bay, e acumulacion di fogeo.
Moises Fernandez, presidente di Aruba Taekwondo Bond (ATB), tabata orguyoso di mira cu nan tur a regresa cu medaya. El a bisa cu eynan por mira cu e esfuerso cu nan tabata pone den e trabou ta duna resultado. Esaki ta un esfuerso largo pasobra awo ta den preparacion p’e Weganan di ODESUR.
ODESUR ta nan siguiente competencia y esaki lo tuma luga den luna di october. E competencia aki ta nan meta principal. Apart di esey, ta prepara di biaha pa e competencia di Centro Americano y del Caribe, unda cu tin clasificatorio pa januari 2023.
Pa mas lesa TREMPAN.COM.
